ሃዋሬታ ኦሶ 12:1-20 in Gamo

¹ ሄ ዎዴ ካዎ ሄርዶሲ ኢሲ ኢሲ ኣማኒዛ ኣሳ ጎዲ ጎዲ ሜቶꬂዴስ።

² ዮሃኒሳ ኢሻ ያቆቤ ማሻን ዎꬊሲዴስ።

³ ኢዚካ ሄሳ ኦꬂዳይ ኣይሁዳታ ኡፋይሲዳይሳ ቤዪዲ ጴፅሮሳካ ኦይꬂዴስ። ሄሲካ ሃኒዳይ ኣይሁዳታስ ኡኬꬃ ባዓሌ ጌቴቲዛ ባዓሌ ጋላሳ።

⁴ ጴፅሮሳካ ቃሾ ኬꬄ ጌልሲዳፔ ጉዬ ኦይዱ ኦይዱ ዎታዳራቲ ታራን ታራን ናጋና ማላ ጊጌቲዳ ዎታዳራታስ ኢሚዴስ። ኢዚ ሄሳꬆ ኦꬂዳይ ፓዚጋ ባዓሌይ ኣꬊዳ ማላ ኬሲዲ ዴሬይ ፒርዳና ማላ ሺሻናሳ።

⁵ ሄሳ ጊሽ ጴፅሮሳ ቃሾ ኬꬄ ጌልሲዲ ናጌቴስ። ጊዶ ኣቲን ዎሳ ኬꬃ ኣሳይ ኢዛስ ኬሂ ሚኖ ዎሳ ዎሲዴስ።

⁶ ሄርዶሲ ጴፅሮሳ ዴሬዛ ሲንꬅ ሺሻና ቆፒ ኡቲ ዲሺን ሄ ቃማ ጊዶꬅ ናምዑ ሳንሳላታን ቃሼቲዲ ናምዑ ዎታዳራታ ጊዶን ኢቺዴስ። ቃሾ ኬꬃ ናጊዛይቲ ኬꬃ ፔንጌ ቦላ ኤቂ ናጊሺን፥

⁷ ጎዳ ኪታንቻይ ኤዚጎንታ ኢስታስ ቤቲዴስ። ኢስቲ ዲዛ ኪፊሌን ፖዖይ ፖዒዴስ። ኪታንቻዚካ ጴፅሮሳ ሚሌ ቦቺ ቤጎꬂዲ “ኤሌ ዴንዳ!” ጊዴስ። ሄራካ ሳንሳላታይ ኢዛ ኩሼፔ ጋዴን ዎꬊዴስ።

⁸ ኪታንቻዚ ኢዛ “ኔ ማይዖ ማይዓ! ጫማካ ኣꬃ!” ጊን ጴፅሮሲካ ኣዛዜቲዳ ማላ ኦꬂዴስ፤ ቃሴካ ኪታንቻይ “ኔ ጋቤ ማይዓዳ ታና ካላ” ጊዴስ።

⁹ ጴፅሮሲካ ቃሾ ኬꬃፌ ኢዛ ካሊ ኬዚዴስ። ጊዶ ኣቲን ኢዛስ ኣጉሞ ቤዪዛ ሚሳቲዴስ ኣቲን ኪታንቻዚ ኦꬂዛይሲ ቱሙ ጊዲዳይሳ ኤሪቤና።

¹⁰ ኮይሮ ዛቤታፔኔ ናምዓንꬆ ዛቤታፔ ኣꬊዲ ጌዴ ካታማ ኬሲዛ ኦጌ ቦላ ዲዛ ቢራታ ፔንጋኮ ጋኪዳ። ፔንጌይካ ባርካ ዶዬቲ ዎꬊዴስ። ኢስቲ ኬዚ ቢዳ። ኢስቲ ቄሪ ኦጌ ዲዛሮ ኣꬊዳ ማላ ኪታንቻዚ ኢዛፔ ሻኬቲዴስ።

¹¹ ጴፅሮሳስ ካሃይ ሲሚሺን “ጎዳይ ባ ኪታንቻ ኪቲዲ ኢዛ ሄርዶሳ ኩሼፔኔ ኣይሁዳቲ ታ ቦላ ቆፒዳ ኡባፌ ታና ኬሲዳይሳ ታ ሃዒ ቱማፔ ኤራዲስ” ጊዴስ።

¹² ሄሳ ኣኬኪ ኤሪዳፔ ጉዬ ዳሮ ኣሳይ ኢሲ ቦላ ሺቄቲዲ ዎሲዛ ማርቆሳ ጌቴቲዛ ዮሃኒሳ ኣዮ ማራሚሶ ቢዴስ።

¹³ ኢዚ ሄ ቢዲ ካሬ ፔንጌ ቆፂን ኢሲ ሮዶ ጌቴቲዛ ጋራዴያ ካሬ ኦኒ ቆፂዛኮኔ ኤራናስ ካሬ ማታ ባዱስ።

¹⁴ ቃላይ ጴፅሮሳይሳ ጊዲዳይሳ ኤራዳ ኬሃ ኡፋዬቲዳ ጊሽ ካሬ ዶዮንታ ዎꬃን ጉዬ ሲማዳ “ጴፅሮሲ ካሬን ፔንጌ ቦላ ኤቂዴስ” ጋዱስ።

¹⁵ ኣሳይካ ኢዞ “ሃኔ ጎያይ!” ጊዳ። ኢዛ ቃስ ዛራ ዛራ ኢስታስ ዮቲን “ሂስቲኮ ሄሲ ኢዛ ናጊዛ ኪታንቻ ጊዶንታ ኣጌና” ጊዳ።

¹⁶ ጴፅሮሲ ቃስ ፔንጌ ቆꬅ ጉጂዴስ። ኢስቲካ ፔንጋ ዶይዲ ኢዛ ቤዪዳ ማላ ማላሌቲዳ።

¹⁷ ኢዚካ ኢስቲ ጮዑ ጋና ማላ ባ ኩሼን ማላቲ ቤሲዲ ጎዳይ ኢዛ ቃሾሶፔ ዎስቲ ኬሲዳኮኔ ሎዔꬂ ዮቲዴስ። “ሃይሳ ዉርሲ ያቆቤሲኔ ሃንኮ ኣማኒዛይታስ ዮቲቴ” ጊዴስ። ሄሳፌካ ጌዴ ሃራሶ ቢዴስ።

¹⁸ ዎንቴꬃ ጋላስ ዎንታራ ዎታዳራቲ “ጴፅሮሲ ዋኒዴ?” ጊሼ ባ ጊዶን ቡልዓኬቲዳ።

¹⁹ ሄርዶሲ ጴፅሮሳ ኣስ ዬዲ ኮይሲዲ ኢዚ ꬋዪዳ ጊሽ ናጊዛይታ ሎዔꬂ ኦይቺዳፔ ጉዬ ኢስታ ዎꬋና ማላ ኣዛዚዴስ። ሄሳፌ ጉዬ ሄርዶሲ ዩሁዳፔ ዱጌ ቂሳሪያ ዎꬊዲ ሄን ኡቲዴስ።

²⁰ ሄርዶሲካ ፂሮሴ ኣሳራኔ ሲዶና ኣሳራ ኦሻ። ሄ ዴሬ ኣሳይ ካꬅ ዴሚዛይ ሄሮዶሳ ዴሬፔ ጊዲዳ ጊሽ ሄ ዴሬ ካዎ ፄሊዛዴ ቢላስፆሳፔ ማዶ ቃላ ዴሚዳ ማላ ኢሲ ቦላ ጊዲዲ ሄርዶሳራ ማቃይንꬃናስ ኦይቺዳ።

¹ He wode kawo Herdoossi issi issi ammaniza asa gooddi gooddi metothides.

² Yohannisa isha Yaqoobe mashshan wodhisides.

³ Izikka hessa ooththiday Ayhudata ufaysidayssa beyidi Phexroosakka oythides. Hessika haniday Ayhudatas uketha ba7aale geetettiza ba7aale gallassa.

⁴ Phexroosakka qasho keeththe gelsidappe guye oyddu oyddu wotadarati taran taran naagana mala giigettida wotadaratas immides. Izi hessatho ooththiday Paaziga ba7aaley aadhdhida mala kessidi derey pirdana mala shiishanaasa.

⁵ Hessa gish Phexroosa qasho keeththe gelsidi naagetes. Gido attin Woosa Keeththa asay izas keehi mino woossa woossides.

⁶ Herdoossi Phexroosa dereza sinth shiishana qoppi utti dishin he qamma gidoth nam7u sansalatan qashetidi nam7u wotadarata giddon ichchides. Qasho keeththa naagizayti keeththa penge bolla eqqi naagishin,

⁷ Goda kiitanchay ezigonta istas beettides. Isti diza kifilen poo7oy poo7ides. Kiitanchazikka Phexroosa mille bochchi beeggoththidi “Elle denda!” gides. Heerakka sansalatay iza kusheppe gaden wodhdhides.

⁸ Kiitanchazi iza “Ne may7o may7a! Caammakka aaththa!” giin Phexroosikka azazettida mala ooththides; qasseka kiitanchay “Ne gaabe may7ada tana kaalla” gides.

⁹ Phexroosikka qasho keeththafe iza kaalli kezides. Gido attin izas agumo beyiza misatides attin kiitanchazi ooththizayssi tumu gididayssa eribenna.

¹⁰ Koyro zabetappenne nam7antho zabetappe aadhdhidi gede katama kessiza oge bolla diza birata pengako gakkida. Pengeykka barka doyetti wodhdhides. Isti kezi bida. Isti qeeri oge dizaaro aadhdhida mala kiitanchazi izappe shaaketides.

¹¹ Phexroosas kahay simmishin “Goday ba kiitancha kiittidi iza Herdoosa kusheppenne Ayhudati ta bolla qoppida ubbafe tana kessidayssa ta ha7i tumappe eradis” gides.

¹² Hessa akeekki eridappe guye daro asay issi bolla shiiqetidi woossiza Marqoosa geetettiza Yohannisa aayo Maaramiso bides.

¹³ Izi he biidi kare penge qooxin issi Roodo geetettiza garadeya kare ooni qoxxizakkonne eranas kare mata badus.

¹⁴ Qaalay Phexroosayssa gididayssa erada keeha ufayetida gish kare doyonta wothan guye simmada “Phexroosi Karen penge bolla eqqides” gadus.

¹⁵ Asaykka izo “Hanne gooyay!” gida. Iza qas zaara zaara istas yootin “Histikko hessi iza naagiza kiitancha gidonta aggenna” gida.

¹⁶ Phexroosi qas penge qoth gujjides. Istika penga doydi iza beyida mala malalettida.

¹⁷ Izikka isti co7u gaana mala ba kushen malati bessidi Goday iza qashosoppe wosti kessidakkonne lo7ethi yootides. “Hayssa wursi Yaqoobesinne hanko ammanizaytas yootite” gides. Hessafekka gede haraso bides.

¹⁸ Wontetha gallas wontara wotadarati “Phexroosi waanidee?” gishe ba giddon bul7akettida.

¹⁹ Herdoossi Phexroosa as yeddi koysidi izi dhayida gish naagizayta lo7ethi oychidappe guye ista wodhana mala azazides. Hessafe guye Herdoossi Yuhudappe duge Qisaariya wodhdhidi heen uttides.

²⁰ Herdoosikka Xiroose asaranne Sidoona asara oosha. He dere asay kath demmizay Herodossa dereppe gidida gish he dere kawo xeellizade Bilasxoosappe maado qaala demmida mala issi bolla gididi Herdoosara maqaynthanas oychida.