ሃዋሬታ ኦሶ 11:2-30 in Gamo

² ሄሳ ጊሽ ጴፅሮሲ ፑዴ ዬሩሳላሜ ኬዚን ቃፃሬቲዳ ኣይሁዳፔ ኣማኒዛይቲ ጴፅሮሳ፥

³ “ኔ ቃፃሬቶንታ ኣሳታ ኬꬅ ጌላዳ ኢስታራ ካꬅ ማዳሳ” ጊዲ ዋላሲዳ።

⁴ ጴፅሮሲ ቃሴ ኢስታስ ጌላና ማላ ማራራ ሂዝጊ ዮቲዴስ።

⁵ “ታኒ ኢዮጴ ካታማን ዎሲሺን ꬊሲኮ ማላ ታና ሊጲጲ ሂስቲዲ ኣጁታን ጊታ ማይዖ ሚሳቲዛ ሚሺ ኦይዱ ባጋራ ኦይኬቲዲ ሳሎፔ ታ ዲዛሶ ዎꬊሺን ቤያዲስ።

⁶ ታ ቲሺ ሂስታ ፄሊሺን ኦይዱ ቶሆራ ዲዛ ሜሄታ፥ ዎራ ዶዓታ፥ ቢታ ቦላ ጎሼቲዛ ሜꬌቴꬃታኔ ሳሎ ቦላ ፒራꬊዛ ካፎታ ቤያዲስ።

⁷ ሄራካ ታና ‘ጴፅሮሳ ዴንዳ! ሃይሳ ሹካዳ ማ’ ጊዛ ቃላ ሲያዲስ።

⁸ “ታካ ‘ጎዶ ሄሲ ሃኔና፤ ታኒ ቱና ዎይኮ ጌሽ ጊዶንታይሳ ሙሌካ ታ ዱናኮ ሺሻ ኤሪኬ’ ጋዲስ።

⁹ “ሄ ካሴ ቃላይ ቃሴካ ‘ፆሲ ጌሺዳይሳ ኔ ቱኒሶፓ’ ጊዲ ሳሎፔ ታስ ዮቲዴስ።

¹⁰ ሄሲካ ሄꬑቶ ሺሬቲ ሺሬቲ ዮቴቲዳፔ ጉዬ ዉሪካ ሲሚዲ ፑዴ ሳሎ ቢዴስ።

¹¹ “ቂሳሪያፔ ታኮ ኪቴቲዳ ሄꬑ ኣሳቲ ሄራካ ሄ ሳቴይን ዪ ጋኪዲ ታ ዲዛ ኬꬃ ካሬን ኤቂዳ።

¹² ታ ኣይኔ ሲꬎንታ ኢስታራ ባና ማላ ፂሎ ኣያናይ ታስ ዮቲዴስ። ሄ ኡሱፑን ኢሻቲ ታናራ ኢሲፌ ቢዲ ኣዴዛ ኬꬄ ጌልዶስ።

¹³ ኢዚካ ፆሳ ኪታንቻይ ኢዛ ኬꬃን ኤቂዲ ኢዛስ ቤቲዳይሳኔ ‘ኢዮጴ ጌቴቲዛሶ ኣስ ዬዳዳ ጴፅሮሳ ጌቴቲዛ ሲሞና ፄይጊሳ።

¹⁴ ኢዚ ዪዲ ኔናኔ ኔሶ ኣሳ ዉርሲ ኣሻና ቃላ ዮታና’ ጊዳይሳ ኑስ ዮቲዴስ።

¹⁵ “ታካ ባዳ ቡሮ ዮቶ ኦይኪሺን ኮይሮ ፂሎ ኣያናይ ካሴ ኑ ቦላ ዎꬎይሳꬆ ኢስታ ቦላካ ዎꬊዴስ።

¹⁶ ካሴ ጎዳይ ኑስ ዮቲሼ ‘ዮሃኒሲ ሃꬃን ፃማቂዴስ ሺን ኢንቴ ፂሎ ኣያናን ፃማቄታና’ ጊዳ ቃላይ ሄራካ ታስ ቆፌቲዴስ።

¹⁷ ሄሳ ጊሽ ኑኒ ጎዳ ዬሱስ ኪርስቶሳ ኣማኒሺን ኑስ ኢሚዳ ፂሎ ኣያና ፆሲ ኢስታስ ኢሚኮ ሂስቲን ፆሳራ ኤቄታናስ ታኒ ኦኔ?” ጊዴስ።

¹⁸ ኢስቲ ሄሳ ሲዪዳ ዎዴ ኢስታስ ጊዛዚ ꬋዪን ጮዑ ጊ ሲሚዲ “ሃይሳ ማላ ጊዲኮ ኣይዛቤቲካ ሃ ኦራꬃ ዴዖኮ ያና ማላ ፆሲ ኣሳስ ማሮቴꬅ ኢሚዴስ ጉሳ” ጊዲ ፆሳ ጋላቲዳ።

¹⁹ ኢስቲፋኖሴ ቦላ ዴንዲዳ ጎዴቴꬃ ጋሶን ላሌቲዳ ኣማኒዛ ኣሳይ ቃላ ኣይሁዳታስ ፃላላ ዮቲሼ ፒንቄ፥ ቆጲሮሴኔ ኣንፆኪያ ጌቴቲዛሶ ጋካናስ ካንꬂ ቢዳ።

²⁰ ቆጲሮሴፔኔ ቃሬናፔ ዪዳ ኢሲ ኢሲ ኣሳቲ ኣንፆኪያ ቢዲ ጊሪኬታሲካ ጎዳ ዬሱሳ ሚሺራቾ ቃላ ዮቲዳ።

²¹ ጎዳ ማዶይካ ኢስታራ ዴስ፤ ቆዳን ኬሂ ዳሮ ኣሳይ ኣማኒዲ ጎዳኮ ሲሚዴስ።

²² ሄሳ ዎሬይካ ዬሩሳላሜን ዲዛ ዎሳ ኬꬃ ኣሳ ሃይꬃን ዎꬊን ዎሳ ኬꬃያ ባርናባሳ ኣንፆኪያ ዬዳዱስ።

²³ ኢዚካ ሄ ቢ ጋኪዲ ፆሲ ባ ኣꬎ ኪያቴꬅ ዴራስ ኢሚዳይሳ ቤዪዲ ኡፋዬቲዴሲኔ ኣሳይ ዉሪካ ኩሜꬃ ዎዝናፔ ጎዳ ኣማኖን ሚናና ማላ ዞሪዴስ።

²⁴ ኢዚካ ፂሎ ኣያናኒኔ ኣማኖን ኩሚዳ ሎዖ ኣሳ። ዳሮ ዴሬይ ጎዳ ኣማኖን ጉጄቲዴስ።

²⁵ ሄሳፌ ካሊዲ ባርናባሲ ሳዉሌ ኮያና ፃርሴሴ ቢዴስ።

²⁶ ኢዛ ዴሚዲ ኣንፆኪያ ኤኪ ዪዴስ። ናምዓይካ ሄን ዲዛ ዎሳ ኬꬃ ኣሳራ ጊዲዲ ላይꬅ ኩሜꬅ ዳሮ ዴሬ ታማርሲዳ። ሄን ኣንፆኪያን ኣማኒዛይቲ ኮይሮ “ኪርሳኔ” ጌቴቲ ፄይጌቲዳ።

²⁷ ሄ ዎዴ ኢሲ ኢሲ ናቤቲ ዬሩሳላሜፔ ዱጌ ኣንፆኪያ ዎꬊዳ።

²⁸ ኢስታ ጊዶፌ ኢሶይ ኣጋቦሳ ጌቴቲዛይሲ ዴንዲ ኤቂዲ ፂሎ ኣያናይ ኢዛ ቤሲን ኣላሜ ኡባን ጊታ ኮሻይ ዴንዳናይሳ ዮቲዴስ። ሄሲካ ኦሮሜ ካዎ ቃላዎዶሳ ቄሳሬ ጌቴቲዛይሳ ካዎቴꬃ ዎዴ ፖሌቲዴስ።

²⁹ ኣማኒዛይቲ ዉሪ ኢሶይ ኢሶይ ባ ዎልቃ ኬና ሚሼ ኬሴቲዲ ዩሁዳን ዲዛ ኣማኒዛ ኢሻታ ማዳናስ ቃቺዳ።

³⁰ ማዶ ሚሻ ኬሴቲዲ ባርናባሳኔ ሳዉሌ ኩሼን ጪማታስ ጋꬃና ማላ ዬዲዳ።

² Hessa gish Phexroosi pude Yerusalame kezin qaxxaretida Ayhudappe ammanizayti Phexroosa,

³ “Ne qaxxaretonta asata keeth gelada istara kath madasa” giidi walassida.

⁴ Phexroosi qasse istas gelana mala maarara hizgi yootides.

⁵ “Tani Iyophphe kataman woossishin dhisikko mala tana liphiphi histidi ajjutan gita may7o misatiza miishi oyddu baggara oyketidi saloppe ta dizaso wodhdhishin beyadis.

⁶ Ta tishshi hista xeellishin oyddu tohora diza meheta, wora do7ata, biitta bolla gooshettiza medhetethatanne salo bolla piradhiza kafota beyadis.

⁷ Heerakka tana ‘Phexroosa denda! Hayssa shukada ma’ giza qaala siyadis.

⁸ “Takka ‘Godo hessi hanenna; tani tuna woykko geesh gidontayssa mulekka ta duunakko shiisha erikke’ gadis.

⁹ “He kase qaalay qasseka ‘Xoossi geeshidayssa ne tunisoppa’ giidi saloppe taas yootides.

¹⁰ Hessika heedzdzuto shireti shireti yootetidappe guye wurikka simmidi pude salo bides.

¹¹ “Qisaariyappe taakko kiitettida heedzdzu asati heerakka he saateyn yi gakkidi ta diza keeththa karen eqqida.

¹² Ta aynne sidhonta istara baana mala Xillo Ayanay taas yootides. He usuppun ishati tanara issife biidi addeza keeththe geldos.

¹³ Izikka Xoossa kiitanchay iza keeththan eqqidi izas beettidayssanne ‘Iyophphe geetettizaso as yeddada Phexroosa geetettiza Simoona xeygisa.

¹⁴ Izi yiidi nenanne neso asa wursi ashshana qaala yootana’ gidayssa nuus yootides.

¹⁵ “Takka baada buro yooto oykkishin koyro Xillo Ayanay kase nu bolla wodhdhoyssatho ista bollaka wodhdhides.

¹⁶ Kase Goday nuus yootishe ‘Yohannisi haaththan xammaqides shin inte Xillo Ayanan xammaqettana’ gida qaalay heerakka taas qofetides.

¹⁷ Hessa gish nuni Goda Yesus Kirstoosa ammanishin nuus immida Xillo Ayana Xoossi istas immikko histin Xoossara eqqetanas tani oonee?” gides.

¹⁸ Isti hessa siyida wode istas gizazi dhayin co7u gi simmidi “Hayssa mala gidikko Ayzaabetikka ha ooratha de7okko yaana mala Xoossi asas maaroteth immides guussa” giidi Xoossa galatida.

¹⁹ Istifanoose bolla dendida goodeteththa gaason laalettida ammaniza asay qaala Ayhudatas xalala yootishe Pinqe, Qophiroosenne Anxokiya geetettizaso gakkanaas kanthi bida.

²⁰ Qophirooseppenne Qareenappe yida issi issi asati Anxokiya biidi Giriketasikka Goda Yesusa Mishiraachcho qaala yootida.

²¹ Goda maadoykka istara dees; Qoodan keehi daro asay ammanidi Godakko simmides.

²² Hessa woreykka Yerusalamen diza Woosa Keeththa asa haythan wodhdhin Woosa Keeththaya Barnabaasa Anxokiya yeddadus.

²³ Izikka he bi gakkidi Xoossi ba aadho kiyateth deraas immidayssa beyidi ufayetidessinne asay wurikka kumeththa woznappe Goda ammanon minnana mala zorides.

²⁴ Izikka Xillo Ayananinne ammanon kumida lo7o asa. Daro derey Goda ammanon gujettides.

²⁵ Hessafe kaallidi Barnabaassi Sawule koyana Xarseese bides.

²⁶ Iza demmidi Anxokiya ekki yides. Nam7aykka heen diza Woosa Keeththa asara gididi layth kumeth daro dere tamarsida. Heen Anxokiyan ammanizayti koyro “Kirsaane” geetetti xeeygetida.

²⁷ He wode issi issi nabeti Yerusalameppe duge Anxokiya wodhdhida.

²⁸ Ista giddofe issoy Agaboossa geetettizayssi dendi eqqidi Xillo Ayanay iza bessin alame ubban gita koshay dendanayssa yootides. Hessika Oroome kawo Qalawodosa Qeesare geetettizayssa kawoteththa wode poletides.

²⁹ Ammanizayti wuri issoy issoy ba wolqa keena miishe kesettidi Yuhudan diza ammaniza ishata maaddanas qachida.

³⁰ Maado miisha kesettidi Barnabaasanne Sawule kushen cimatas gaththana mala yeddida.