5 Iiyu/ mo dhali p̱ar to jin miikin ma Arumgimis e mo. A’di miiki’da dhan to kun caaca kagahara e bwaŋ ’kwani gi mony’cesh mo.
6 A’di ṯu’kki ḵumma/ yi’de/ mo mmota a’cesh jin ḵuthaḵu’th mo. Dhali ’kwani iikin ki sho’k e bwam yi’de/ jin ḵu’thki’d mo. Dhali e mun mo tani aman ’kunykina bwa mo e a’di mo,
7 a’di jin jiki’da ji ki mo ma dem dem piti ki sule/ sule/ mo, a’di jin timki kal gi mony’cesh gi ’kwani ki em piti mo, dhalku/ ki dhal uni gwansan bway mo uni kun pishi is buni ka le’d mo mmodhu is buni ki ca mo. Doshi ma dhali ’cunycuri yan mo.
8 Mom’bor mii goma Arumgimis bana mo, ayy ’kwani, dhalki cuuwa/ jin minu maŋ a’di dhalki a’di ciḵu mo,
9 a’di jin dhuki ana e bwaman ’kwani kun ’kon ki e mo, dhali diki dhal sho’k bana bway mmoyeres mo.
10 Haali/ /e, ayy Arumgimis, /e nyo/ki aman mo. Dhali /e palki aman me’d ’dolkon kush jin palu ki o’d mo.
11 /E ki sus am eya gume/ mo. /E ki ’thi monṯo’c bwa e empa’d bam mo.
12 /E ki dhal ’kwani bway mo mmomeri ’kup̱i aman mo. Aman iikina e mo/o’d mo dhali e yi’de/ kun shwana nyor mo, hili /e din mmosus am e embul mo kun beeyabee mo.
13 Aha/ mina ya e gu’b pini mmoc̱i to jin ’ciṯẖu/ ’kus mmo’tha ki o’d mo. Aha/ mina c̱i /e gwo jin oka/ is mo,
14 a’di jin bahkina ’twam pem mo dhali ’twam pem oki gwo is mo me’d jin dika/ e monṯo’c bwa mo.
15 Aha/ mina c̱i /e to jin c̱inu mmo’ciṯẖ ’kus jin ta guŋkulus ḵa’bal mo, nyaḵka ku’d ma rasiŋ ḵa’bal mo kun ’ciṯẖu/ ’kus mmo’tha ki o’d mo. Aha/ mina c̱i to jin ’ciṯẖu/ ’kus kun ta gwaṯẖim bip̱ dhali mi mo. Doshi ma dhali ’cunycuri yan mo.
16 Iiyu/ mo dhali ciḵ gwo mo, aris umi ’baar mo kun ḵo/kina Arumgimis mo, dhali aha/ mina ṯor a’di jin miikunu gom aha/ mo.
17 Aha/ ’therkina cuuwa/ kagahara gom a’di mo, dhali a’di karkunu ki ca ki ’twa/ pem mo.
18 Waḵki/ aha/ mina ’taki thip̱ tonthus eya dum pem mo tani Tap̱a a’di midi ’taki diki ciḵ aha/ ’twa/ mo.
19 Hili ka jiŋ gana/ Arumgimis a’di iciḵki’da ciḵ mo. A’di c̱iki’da hirdhe/ ki ’twa/ pem jin ’thoka/ mo.
20 Mom’bor mii goma Arumgimis mo, haali/ a’di diki waḵ mon’thom pem mo, walla joc̱ mo/en piti jin ṯelu sho’k ’peni aha/ mo.
