Hechos 2:4-39 in San Blas Kuna

⁴ Belagwapa dulemar-bukwadgi Bab-Dummad-Burba-Isligwaled ubononikid. Degidbali, gangudmalad, gaya akar-akar sunmakdemalad. Bab-Dummad-Burba-Isligwaled ega gaya-ukedba, sunmakdemalad.

⁵ Deunni, bela Judíoʼmar-we-yar-naid-ugakse-bukmalad nue-islikwaa-nanadimaladi, iba-dakega Jerusalénʼse nonigusmalad.

⁶ A-dulemar ibmar binnasur uurmake itoarmargu, bela danar ambikunonimalad. Neggunaid geger-dakarmalad, ar itoarmalad, Jesúsʼba-nanaimaladde emar-sunmaked-gayaba sunmakbukmala.

⁷ Neggunaid geger-dakmalad, aku-itomarbalid, wede ibiga deyob gunai. Degisoggu, sokarmalad: “Be dake, we-dulemar-sunmakbukmaladde, ¿we Galilea-dorgansursi?

⁸ Degite, ¿ibiga we-dulemarde nabir anmar-gayaba sunmakmarsunna?

⁹ ”Ar anmar-wegi-bukwamaladi neggwebur-baid-baidsikmaladid. Gwen-gwen anmar: Partiaʼginmaladid, Mediaʼginmaladid, Elamʼginmaladid. ”Degi, abala anmar, Mesopotamiaʼgi-mamaimaladid. Judeaʼginmaladid, Capadociaʼginmaladid, Pontoʼginmaladid, degine, Asiaʼginmaladid.

¹⁰ Frigiaʼginmaladid, Panfiliaʼginmaladid, Egiptoʼginmaladid, Cirene-nagaba-Libia-siid-ginmaladid, Judío-dulemar-Roma-akar-danimaladid, degi, dule-Judío-igarba-dogsamaladid.

¹¹ Cretaʼginmaladid, degine, abala anmar Arabiaʼginmaladid. Emide, anmar bela Galilea-dorgan anmar-gayaba Bab-Dummad ibmar-gegerdaklemalad-imaksadgi-sunmakbukwad itobukmalad.”

¹² Geger dakmalad, nue-aku itomarbalid, na muchub-muchub ega sokarmarsunnad: “Weyob-ibmar-gunaidde, ¿ibi nue obare?”

¹³ Abala we-dulemala, Jesúsʼba-nanaimaladgi dododmalad, sunmakdemalad: “Wemardi mummu-bukwamarye, e-annik sogdemalad.”

¹⁴ Degi, Pedro na e-ambe-gakagwensakadmala (11), dulemar-abargi gwisgusad. Geb binnasur sunmakded, sogded: “Gwenadgan-Judea-dorgan, degi, bela bemar-Jerusalén-neggweburgi-bukwamaladi, nue be an-itomalo. An bemarga sogodo, wede ibi nue obare.

¹⁵ Bemar-we-dulemar-mummuye-bimaladi, mummusurmalad. Ar geb dad-abala-nikad be daksurmarsi. ¿Dulemar dad-abala mumgudii bemar dakdisi?

¹⁶ ”Ar we-bemar-dakedi, bato Bab-Dummad-gayaburba-barsoged-Joel weyob sogsagusad:

¹⁷ ”Bab-Dummad soged: ‘An-Burba bela-dulemargi an odenonikoed. Be-masmala, degine, be-bunamala, an-gayaburbagi sunmakdemaloed. Degine, dule-selebagusmalad gabdakdemaloed, be-sapinganmala neg-burbagan dakdemaloed.

¹⁸ Deginbali, an-mai-machergangi, an-mai-omegangi, An-Burba an odebaloed. Geb amar an-gayaburba-barsogega gudmaloed.

¹⁹ Degine, nibneggi ibmar-gegerdaklemalad an oyogoed. We-napneggi ibmar-dakledisurmalad an oyobaloed. Ablisbi neg-nagunonikoed, soo-dummadi oyolegoed, degine, waa-bupurmagwichi neg gudoed.

²⁰ Dad-ibeler a-ibagangi bar gaosulid, nii ablisyob ginnitibi nagumogoed, Bab-Dummad-e-iba-danikid-idu, deyob neg-gunonikoed. We-Bab-Dummad-iba, gwayed-dummadid, boni-dummad-ibad.

²¹ Dule Bab-Dummad e-abonogega-imakdibe, a-dule abonolenonikoed.’ ”

²² Pedro sogdebalid: “Israel-dorgan, an-bemarga-ibmar-sogoedi nue be itomalo: Jesús Nazaret-dolad, bemardi nue-wismalad, bemar-abargi Bab-Dummad-nuggi ibmar-dakledisurmaladi, ibmar-wilubgan, degi, ibmar-gegerdaklemaladi oyosad, ar a bemar bela-wisi bukwamalad, adi, bemar dakega, Jesús doa-dule gue.

²³ Ar gebesaila Bab-Dummadi bato sogsad, Jesús nue-wilegergebye, degine, e-isdarmaladga uklegoye sogsad. Emide, bemar oburgwemalaga Jesús-gasgusmalad, bemar Roma-sordamarga uksagusmalad.

²⁴ ”Degi-inigwele, Bab-Dummaddi Jesús-odulosad, burgwed-abargi onosad. Ar ade, burgwed Jesúsʼgi geg obined.

²⁵ A-ular, epenne, David, Jesúsʼgi weyob sogsagusad: ‘Mer an isguedse galakuega, Bab-Dummad an-argan-nuedsik gudiguad, deyob an-idudii an dakdiguad.

²⁶ A-ulale, an-gwagegi an yeer-itoged. Weligwaledba an namaksun. Degi, bela an-sana gannar-durguoedi bensuli edarbesun.

²⁷ Gwen be an-san-burba neg-uangi oyogsaosulid. Ar be-mai-gwage-swilidikid-e-mui gwen neg-uangi onunsaega be imakosulid

²⁸ Igar-nuedba-gudigued be anga oyosad, be-asabinni bela-belad weligwar-gudii be an-imaked.’ ”

²⁹ Pedro sogdebalid: “Gwenadgan, anmar bela dad-dummad-David-burgwisad, degine, diglesad, wismalad. Emi-ibagine, amba e-neg-uan siid. David na e-sangi sunmaksasulid.

³⁰ ”Ar David Bab-Dummad-gayaburba-barsogedid, degisoggu, nue-wissunnad, igi-Bab-Dummad ega ise-sogar imaksa. Ega weyob sogsagusad: ‘Be-wagwa-gwensak beyob reyga an omesoye.’

³¹ ”Degisoggu, David bato daknaiyobi, iduakwaa Cristo-gannar-durguoedgi sunmaksad. David deun weyob sogsagusad: ‘Bab-Dummad-dule-wargwen-bega-barmidagoye-sogsad-dule neg-uangi sadegumai guosulid, agi nungumai guosurbalid.’

³² ”A-Jesús-sunnad, Bab-Dummad gannar odulosad. Jesús-gannar-durgusad, bela anmar daksamalad.

³³ Degisoggu, Bab-Dummad-argan-nuedsik dummadga Jesús sigidapsunnad, degi, Bab-Dummad-Burba-Isligwaled-uklegoye-soglesadi, Jesúsʼga uklessunnad. Geb a-Burba-Isligwaled, Jesús anmarga uknaimogad. Emide, a-igar bemar daknaimalad, degi, itobukwamarbalid.

³⁴ Ar ade, David nibnegse nakwiapsulid, degite, David-sunnad sogbalid: ‘Bab-Dummad an-Dummadga sogsad: An-argan-nuedsik be sige,

³⁵ be-isdarmalad an bela ogalakuedse be sige.’

³⁶ ”Degisoggu, bemar-Israel-dulemar, bela be we-igar wisgumalargebed. We-Jesús bemar nakrusgine-oburgwismaladi, Bab-Dummadi, Dule-Dummadga imaksad, degi, E-nuggi-sulealedga imaksabalid.”

³⁷ Dulemar, Pedro-deyob-ibmar-soged itosmargu, nue-bukib itodmalad. Geb Pedroʼga, degi, Jesús-e-sapingan-bur-dummagan-baiganga sogdemalad: —Degite, gwenadgan, ¿igi anmar saergebe?

³⁸ Pedro, abin-sogded: —Be-isgudiidga na be bukib-itomarsun, egi be bangumarsun. Bab-Dummad-sogedba be nanamarsun, degi, Jesucristo-nuggi Bab-Dummad-diigi-ogleged-igar be imakmarsun, adi, Bab-Dummad be-isgudiid bemarga elioed, E-Burba-Isligwaled bemarga ukoed.

³⁹ ”Ar Bab-Dummad E-Burba-Isligwaled-ukoye-sogsadi, bemarga, be-mimmiganga, degi, dulemar-ainebarmaladga ukegarmogad. Wegisundo, Bab-Dummad doa-dulemarse gorbie, a-dulemarga E-Burba-Isligwaled ukoed.”

⁴ Belagwapa Bab Dummad Burba Nued bela-bela Jesúsba-nanaimaladgi ubononigu, gangudmalad, gaya akar-akar sunmakdemalad, ar igi Bab Dummad Burba Nued ega sogedba, aba sunmakdemalad.

⁵ Deunni bela Judiomar-we-napneg-naid-ugakse-bukmalad nue-islikwaa-nanadimaladi Jerusalénse nonigusmalad, iba dakegar.

⁶ A-dulemar ibmar binnasur gote itoarmargu, bela danar ambikunonimalad. Agine, geger Bab-Jesúsba-nanaimalad-dakdemalad, ar ade dule-gaya-baid-baid-sunmakmalad itoarmalad Jesúsba-nanaimalad emar sunnaa sunmakmala.

⁷ Degisoggu, bela geger dakdemarsundo, degi, aku-itomarbarsundo, wede igidbarsunna. Degisoggu, na sokarmarsundo: “Be dake, ¿wemarde sunmakbukmaladde Galilea-dorgansursi?

⁸ ¿Ibiga wemarde nabir anmar na-gin-gwalulesad-gaya sunmakmarsunna?

⁹ “Anmardi Partia-dorgan, Media-dorgan, Elam-dorgan, degi, anmar Mesopotamiagi-bukwamalad, Judeaginmalad, Capadociaginmalad, Pontoginmalad, degi, Asiaginmalad,

¹⁰ Frigiaginmalad, degi, Panfiliaginmalad, agi, Egiptoginmalad, agi, Libia-dor-Cireneginmalad, degi, Roma-akar-danimalad, Judiomar, degi, Judio-igarba-dogsamalad,

¹¹ degi, Cretaginmalad, Arabiaginmalad. Emide wemar-Galilea-dorgan, nabir anmar-gayaba Bab Dummad ibmar-geger-daklemalad imaksadgi sunmakmargu.”

¹² Degisoggu, belagwapa geger dakmalad, degi, aku itomarbalid, aga na muchub-muchub ega sokarmarsunnad: “¿Wede igid barsunna, gaya akar-akar sunmakmargu?”

¹³ Degisoggu, abala Bab-Jesúsba-nanaimaladgi dododmar, sogdemarsun: “Wemardi mummu-bukwamalad.”

¹⁴ Degi Pedro na e-ambe-gakagwensakad-gwichid-abargi gwichimoga, binnasur sunmakde, sogded: “Judea-dorgan, degi, bela bemar-Jerusalén-neggweburgi-bukwamalad, nue be an-itomalo. An bemarga sogodo, wede ibi nue obarsunna.

¹⁵ We-dulemar bemar mummuye bimaladi, mummusurmalad, ar amba neg wagdarad. ¿Dulemar neg-wagdar mungudii bemar dakdisi? Degisoggu, noar be sogmalad.

¹⁶ “Ar wemar bemar dakedi, bato Joel, Bab-Dummad-gaya-burba-berbeged sogsa-gusad:

¹⁷ Bab Dummad soged: ‘We-napa-naid-ibagan-bergued mosale, An-Burba-Nued bela dulemargi an odegoed. Be-masmala, degi, be-bunamala, an-gaya-burba barsogmaloed, degi, be-sapingana ibya-apuredgii ibmar dake-gumaloed, degi, be-sergan gabdakedgi nabir ibmar dake-gumaloed.

¹⁸ Degi, a-ibagangi an-maigan-machergangi, agi, an-maigan-omegangi, An-Burba-Nued an odegoed. Geb amar an-gaya-burba-barsogega gudmaloed.

¹⁹ Degine, nibneggi ibmar-geger-daklemalad an oyogoed, agine, we-napneggi ibmar-dakledisurmalad an oyobaloed; abe, soo, degine, waa booyobi bela neg-gaoed.

²⁰ Dad-ibeler a-ibagangindi bar gaosulid, agine, nii abeyob ginnidbi nagumogoed, Bab-Dummad-ibagan-danikoed-iduar, deyob neg guoed, dummarba neg degi-oyolegoed.

²¹ Ar ade doa-dule, Bab Dummadse abonoleged egisbiele, a-dule abonolegodo.’ ”

²² Pedro sogdebar: “Israel-dorgan, we an-bemarga-ibmar-sogoedi nue baritomalo: Jesús Nazaret-dola, bemardi nue wismalad, bemar-abargi Bab-Dummad-nuggi ibmar-dakledisurmaladi, ibmar-geger-daklemalad-wilubgan oyosad, ar a bemar bela-wisi bukwamalad, adi bemar dakega, na doa-dule gue.

²³ Ar igi Bab Dummad na iduar igar-mesisadgii, bemarga Jesús uklenonigu, bemar gasmargu, dule-iskanamar bemar-bendaksadba nakrusgi be Jesús-bioksamalad, oburgwegar.

²⁴ “Degi-inigwele, Bab Dummaddi Jesús-odulosad, burgwed-nunmaked-abargi ogwichisad, ar ade burgwed Jesúsgi geg obined.

²⁵ A-ular, David Bab Dummadgi wegi-sogsa-gusad: Dule-Dummad an-idudii an dakdiguad, an-argan-nuedsik gudii, adi mer ibmar dobee an itogegar.

²⁶ Degisoggu, an-gwagegi an wergusun, weligwar an sunmaksun, degi, bela an-san unnila gannar durguoed bensuli edarbesun.

²⁷ Aga uangi an-san-burba gwen be oyogsaosulid, ar be-mai-gwage-swilidikid-e-san gwen uangi onunsaega be imakosulid.

²⁸ Be anga igar-nuegan dula-saila gudigued oyosad, degi, be anba gudidbali weligwar an itoged.”

²⁹ Pedro sogdebar: “Gwenadgan, bela anmar wisid, anmar-dad-David-nugad burgwisad, degine, diglesad, agi e-neg-uan emi amba anmar-abargi daklediid. Degisoggu, David na e-sangi sunmaksasurdo.

³⁰ “Ar David Bab-Dummad-gaya-burba-berbegedsoggu, nue wissunnad, igi Bab Dummad ega sogsagusa, gege-bar-osuloged-igargi ega sogsagu: Yoedse be-wagwa-wargwen beyobi reyga megmogoye.

³¹ Degisoggu, bato daknaiyobi, David sogsad Cristo gannar durguoedgi. David deun weyob sogsa-gusad: ‘Bab-Dummad-dule-wargwen-bega-barmidagoye-sogsad-dule neg-uangi sadegu mai-guosulid, degine, agi nungumai-guosurbalid.’

³² “A-Jesús-sunnad, Bab Dummad gannar odulosad. Jesús-gannar-durgusad, bela anmar daksamalad.

³³ Degisoggu, Bab-Dummad-argan-nuedsik dummadga Jesús sigidapsunnad, degi, Bab Dummad Burba Nued ukoye sogsadi Jesúsga uklessunnad, geb A-Burba-Nued, Jesús anmarga uknaimogad. A-igar bemar daksamaladi, degi, itosmaladi, Jesúsgi bela danikid.

³⁴ Ar ade David nibnegse nakwissulid, degite David-sunnad sogbalid: Bab Dummad an-Dummadga soged: ‘An-argan-nuedsik be sige,

³⁵ bela be-istarmaladgi be nakwedse.’

³⁶ “Degisoggu, bela bemar-Israel-dorgan, nue itomarsun, napira an bemarga sogmalad, we Jesús bemar nakrusgine-oburgwismaladi, a-Jesús-sunnadi Bab Dummad Dule-Dummadga imaksad, degi, Cristoga imaksabalid.”

³⁷ Dulemar-Pedro-itobukmalad deyob Pedro soge itosmargu, nue gwagegi bukib itodmalad. Pedrose, degi, baigan-Jesús-nuggi-barmilearmaladse egichiarmarsunnad: —Degite gwenadgan, ¿igi anmar saer nabirsunna?

³⁸ Pedro, abin-imakded: —Be-iskudiidga na be wargwen-wargwen bukib binsamar, degi, egi be bangumar, geb degi Bab Dummadse be dagmar, degi, Bab-Dummad-digi-ogleged-igar be Jesucristo-nuggi imakmarsun, adi Bab Dummad be-iskudiid bemarga eliegar, geb adi E-Burba-Nued bemarga ukegar.

³⁹ “Ar Bab Dummad E-Burba-Nued bemarga ukoye sogsadi, ar bemarga ukegalad, degi, be-mimmiganga, degi, dulemar-dikasur-Bab-Dummadgi-gudimaladga, ar doa-dulemarse Dummad, anmar-Bab-Dummad na gorbiedse.”