Hechos 23:10-26 in San Blas Kuna

¹⁰ Na abin-abin-imaknanaid aka bur-gannaleded. Degidbali, Roma-sorda-bur-dummad dobe itoalid, abakalegi Pablo emarse san-dubamakalirye binsaalid. Agala, sordamar barmisad, adi, gandikidgi oimakbukwad-abargi, Pablo-sedagega, gannar Roma-sordamar-negse nidagegar.

¹¹ A-banedgi mutikidgine, Bab-Jesús, Pabloʼse magarosad, ega sokalid: “Pablo, mer sikirmako, gandik-sao. Igi wegi Jerusalénʼgi an-nuggi be sunmaksa, deyob Roma-neggweburgi an-nuggi be sunmakdapaloed.”

¹² A-banedgine, gwenna-gwenna Judíoʼmar Pablo-oburgwega igar amismalad. We-Judíoʼmarde ise-sogar sogsamalad, emarde, Pablo-oburgwedse geb mas gunmaloye, geb ase gobmarbaloye. Emisgindi, emarde mas gunnosurye, gobosurmarbarye sogsamalad. Ar deyob imaksulile, emarde sabsur-odurdakleged bur nabirye.

¹³ Dulemar-deyob-sogsamaladi e-dulabo-gwena (40+) mergumalad.

¹⁴ Geb dule-irwa-Babse-gormalad-e-dummaganse, Judíoʼmar-girmar-dummaganse, nadmarsunnad. Amarga weyob sogdapmalad: “Anmar igar-geg-bar-osuloged mesismarye, anmar sogsamarye, Pablo-oburgwedse geb mas gunmaloye, geb ase gobmarbaloye. Emisgindi, anmar mas gunnosurye, gobosurmarbarye. Ar anmar deyob imaksulile, sabsur-odurdakleged bur nabirye, anmar sogsamalad.

¹⁵ Degisoggu, bemar, degi, Judío-dummagan-igar-nabiromaladi, anmarga Roma-sorda-dummadse be egismaloed, ega yamo be sogmaloed: ‘Bane, anmarga be Pablo sedabi an abeye, anmar nue ega igar baramiegarye, ega be sogmaloed.’ Anmardi igarba guagwar Pablo-oburgwega ambikumaloed.”

¹⁶ Pablo-e-niga, dulemar-deyob-sognanaid-itosgu, Pablo-owisogega Roma-sordamar-ambikued-negse nadegusad.

¹⁷ Degi, Pablo Roma-dule-sorda-dulatar-sediid-wargwense (100) gochad, ega sogded: —Be-dummadse we-machigwa be sede. We-machigwa be-dummadga ibmar-soged nikad.

¹⁸ Roma-dule-sorda-dulatar-sediid (100) e-dummadse machigwa-sessunnad. E-dummadga sogdapid: —Pablo-esgaryagi-mellesiid anse gochado, anga sogdo, besega we-machigwa sedaye. Ar ade, we-machigwa bega ibmar sogoye.

¹⁹ Roma-sorda-bur-dummad argangi-gasa machigwa-imaksad, geb bachikii sesad. Geb ega sogded: —Degite, ¿ibi be anga sogbie?

²⁰ Geb machigwa ega ibmar sokarsunnad: —Judíoʼmar na igar-amismalad bese egismalagar, bane Judío-dummagan-igar-nabiromaladse Pablo-sedaye, emarde nuekwaa Pabloʼga igar amibimarye, yamo bega sogmaloed.

²¹ Mer be amar-itogo. Machergan-e-dulabo-gwena (40+) igarba dukuar edarbebukmaloed. Amar sogsamalad, Pablo-oburgwedse geb mas gunmaloye, geb ase gobmarbaloye. Emisgindi, emarde mas gunnosurye, gobosurmarbarye, sogsamalad. Ar deyob imaksulile, emarde sabsur-odurdakleged bur nabirye, sogsamalad. ”Emide, guakwaa bato bukwamalad. Unnila be-ibmar-sogoed edarbebukmalad.”

²² Degi, Roma-sorda-bur-dummad gannar machigwa-barmisad, ega sogsad: —We-ibmar be-anga-sogsadi melle dulemarga sogoye.

²³ Roma-sorda-bur-dummadi sordamar-dulatar-sediid-warbogwadse gochad, ega weyob igar uksad: —Emi-mutik Cesarea-neggweburse be Pablo-sedmalaga wachi-ilabakebakad-idu (9), guakwaa sordamar be urbemalo. Weyob-mergu sordamar be sedoed: Sordamar-nagab-nanamalad, dulataled-ilabo (200). Moli-birgi-sii-nanamalad, dulapaa-gakambe (70). Degi, sordamar-eswar-swiswidikidgi-urwemalad, dulataled-ilabo (200).

²⁴ ”Deginbali, Pablo-sedega moli-amimarbalo, adi, nuedgi, gwen akar-gussuli Dummad-Negdakmaid-Félixʼye-nugadse, Pablo moegar.”

²⁵ Roma-sorda-bur-dummad amarba weyob garda narmakar barmisad:

²⁶ “Wegi Claudio-Lisias, Dummad-Félixʼga garda-barmisiid. ”Bitigi be nued-gudina gadin.

¹⁰ Na abin-abin imaknanaid aka-bur-gannalemaisoggu, Roma-sorda-dummad dobe itoalid, abakalegi Pablo emarse san-dubamakalirye. Agala sordamar barmisad, adi gandikidgi oimakbukwad-abargi, Pablo-sedagega, gannar Roma-sordamar-negse nidagegar.

¹¹ A-mutikidgine, Bab-Jesús Pablose na magarosad, ega sokalid: “Pablo, gatik na san be ganna sao, mer galakuo, igi an-nuggi wegi Jerusaléngi be sunmaksa, deyob Romagi an-nuggi be sunmakbaloed.”

¹² A-banedgine, gwenna-gwenna Judiomar na igar amismalad, Pablo-oburgwemalagar. Amar na sogsamalad, napiraye, emarde mas gunnosurye, degine, gobmalosurbarye, Pablo-oburgwedse. Ar deyob imaksulile, emarde sabsur-odurdakleged bur nabirye.

¹³ Dulemar-degi-sogsamaladi e-dulabo-gaka mergumalad.

¹⁴ Degisoggu, amar dule-irwa-Bab-Dummadse-gormalad-e-dummaganse, degi, Judiomar-girmar-dummaganse nadmarsunnad, degi, amarga sogdapmarsunnad: “Igar-geg-bar-osuloged anmar mesismarye, anmar sogsamarye, napiraye, anmar bipisaale ibmar gwen gunnosurye, Pablo-oburgwedse. Ar deyob imaksulile, anmar sabsur-odurdakleged bur nabirye.

¹⁵ Degisoggu, bemar, degi, Judio-dummagan-igar-nabiromaladi, Roma-sorda-dummadse be egismaloed, yamo yardakar, ega bemar sogmaloed, ‘Bane anmarga Pablo-sedabi anmar abeye, adi anmar nue ega igar baramiegarye.’ Anmardi igarba guagwar ambikumaloed, Pablo-oburgwegar.”

¹⁶ Pablo-niga, dule-sognanaid degi-soge itosgu, Roma-sordamar-ambikued-negse nade-gusad, Pablo-owisogegar.

¹⁷ Degi, Pablo Roma-sordamar-dulatar-sediid-wargwense gochad, ega sogded: —We-machigwa be-dummadse be sede, ar we be-dummadga ibmar-soged wis nikad.

¹⁸ Degi Roma-sordamar-dulatar-sediid na e-dummadse sessun, ega sogdapid: —Pablo-eskaryagi-mellesiid anse gochad, degi, anga sogsad, bese ‘We-machigwa sedaye.’ Ar ade we bega ibmar-wis-soged nikad.

¹⁹ Roma-sorda-dummad machigwa argangi gasgua, bachikii nisa-gusad, geb ega sogded: —¿Ibi be anga sogbie?

²⁰ Geb degi machigwa ega ibmar sokarsunnad: —Judiomar na igar-amismalad bese egismalagar, bane Judio-dummagan-igar-nabiromaladse Pablo-sedaye, emarde nuekwaa ‘Pabloga igar amibimarye’ yamo bega sogmaloed.

²¹ Mer emar be itogo. Machergan-e-dulabo-gwena igarba dukuar edarbebukmalad. Amar sogsamalad, napirye, emarde mas gunnosurmarye Pablo-oburgwedse. Ar deyob imaksulile, emarde sabsur odurdakleged bur nabirye. Emide guakwaa bato bukwamalad, unnila be-ibmar-sogoed edarbebukmalad.

²² Degi, Roma-sorda-dummad gannar machigwa-barmisad, ega sogsad: —Mer dulemarga sogo we ibmar be-anga-sogsad.

²³ Degi, Roma-sorda-dummad sordamar-dulatar-sediid-warbose gochasunnad, ega igar uksa, sogded: —Emi mutik wachi-ilabakebakad-idu guakwaa sordamar be urbemalo. Sordamar dulataled-ilabo be sedmalo, moli-birgi-sii-nanamalad dulapaa-gakambebar, degi, dulataled-ilabobar espunyar-nika-nanamalad, adi Cesarea-neggweburse be Pablo-sedmalagar.

²⁴ Deginbali, moli-birgi-sii naega Pabloga moli-amimarbalo, adi nuedgi, gwen akar-gussuli dule-dummad-neg-dakmaid, Félix-nugadse, Pablo-warmakegar.

²⁵ Roma-sorda-dummad amarba weyob garda narmakar barmisad:

²⁶ “Dummad-Félix, bedi nued neg-dakmaid. Andi Claudio-Lisias bega garda wis barmisiid. Andi nued gudiid.