15 Dala idia rakatania, unai hanua dekenai do idia noho totona. Hanua lalonai idia raka vareai, bona hanua ena ariara dekenai idia helai diho, badina tau ta ese idia ia abia dae lasi iena ruma dekenai.
16 Unai adorahi dekenai tau buruka ta be iena uma gaukara dekena amo ia mai. Ia be guna Eparaima ororo tano dekena amo ia mai, to Gibea hanua dekenai ia noho, to hanua dekenai idia noho taudia be Beniamina taudia.
17 Tau buruka ese ariara dekenai ia helai laolao tauna ia itaia. Tau buruka ia gwau, “Oi be edeseni oi lao, bona edeseni oi mai?”
18 Levi tauna ia haere, ia gwau, “Ai be Betelehema, Iuda tano, dekena amo ai mai. Hari ai be aiemai ruma Eparaima ena ororo dekenai ai giroa lao noho. To tau ta ese iena ruma dekenai ai ia abia dae lasi.
19 Ai be mai rei kaukau bona aniani aiemai doniki totona, bona beredi bona uaina idia noho lau, bona egu hahine, bona egu hesiai tauna totona. Aiemai aniani ibounai ia noho.”
20 Tau buruka ia gwau, “Egu ruma dekenai umui noho diba! Lau ese umui do lau naria, lau ura lasi ariara dekenai umui noho ela bona dabai.”
21 Vadaeni ia ese iena ruma dekenai idia ia hakaua vareai, bona doniki dekenai edia aniani ia henia. Ranu be iena vadivadi taudia dekenai ia henia, edia aena idia huria, bona idia aniani bona inuinu.
22 Idia moale noho neganai, lebulebu taudia haida be ruma idia hagegea, bona iduara idia botaia dikadika. Idia ese ruma biaguna, unai tau buruka, idia hamaoroa, idia gwau, “Oiemu ruma dekenai ia noho tauna do oi hakaua murimurina dekenai, ai ese do ai sihari henia.”
