Guinuwa 1:10-16

¹⁰Niꞌatu ꞌipilisinedi, ta ꞌetamo sidunedune galewaya, ga tai ꞌeluwa ma ꞌadi ꞌoama wakewakekedi selabediya sitoolo,

¹¹ga sigwae, “Me Galili ye, toꞌase manuna wadunedune galewaya? Yaubada niꞌatu Yesu nina ꞌiꞌauꞌewena galewaya, ta maꞌetamo ꞌimwaꞌuta limanama, be ꞌina mwaꞌutama ꞌana ꞌita ꞌetamo nadigega ꞌina tuꞌe nina niꞌa waꞌitena.”

¹²ꞌEnega ꞌoya ꞌana esana Olibe ꞌenega siila ga sitauya Yelusalema, nate nigeya ꞌedasola, nadigega tomota siadadana ꞌasiyata Sabate ꞌenaya.

¹³Ga silugu ꞌidi anuwaya ga situꞌe anuwa etaninaya, taudi Pita be Yoni be Yemesa be Anidulu be Pilipi be Tomasi be Batolomiu be Madiu be mali Yemesa (tauna Alipio natuna) be Saimoni (tauna lowa togewana ꞌebeloina manuna) be Yudasa (tauna Yemesa natuna).

¹⁴Maiboꞌadi getedi ꞌidi ꞌatetagwalega sisidasida Yaubada ꞌena, iine maꞌediyao, be Meli, tauna Yesu sinana, be Yesu tasinao wate maꞌediyao.

¹⁵Boda nidi ꞌadi yau nadigega wani analedi be tuweniti, ga ꞌebweu ꞌasiyata ꞌenaya Pita gamwagamwanidiya ꞌitoolo ta ꞌieonedi, ꞌigwae,

¹⁶“Tasigwao, lowa Debida ꞌina ona Yaluyaluwa Tabuna ꞌiꞌebwaꞌena Yudasa manuna, ta Buki Tabu ꞌena ꞌimiyami. Yudasa nina lowa maꞌedai taetosimana Yesu manuna, ta saꞌi ꞌida ꞌInapwana ꞌisipupuyena ga ꞌiꞌebwayaena Yesu ꞌana talauwalao nimadiya. Ta ꞌebweu wali Buki Tabu solanaya Debida ꞌina ona Yudasa manuna, gete nadigega ꞌigwae, ‘ꞌIna ꞌasa ꞌida wabolebole, be geyaꞌabo ꞌebweu yaita tomota ꞌenaya ꞌida miyami.’ Ta wate ꞌigwae, ‘ꞌAna lopaꞌelu tauna ꞌina paisewa ꞌida ꞌewa.’ ꞌEnega ꞌilobwenena be ona gete ꞌana mwalatoi ꞌaiꞌaila ꞌida apwesa.” Pita ꞌina ona gete nadigega manuna Yudasa niꞌatu ꞌimwawasa. Tauna lowa ꞌina guinuwa toꞌumalina ꞌana maisa ꞌenega bwaꞌa ꞌiegimwanena, ga bwaꞌa nina solanaya ꞌibeꞌu sanamwaꞌuta, ga gamwana ꞌilosabuyena, ta diyana maiboꞌana ꞌiapwesa, ga tetelina me Yelusalema maiboꞌadi sinononaya, ga ꞌenadiyega bwaꞌa nina sieesena “Akelidama,” ta ꞌana mwalatoi “Bwaꞌa lala.”