15 Ɓee yimɓe nganaa sigirɓe hono no onon miildaton nii, sabi jooni yo ɲawlal tan.
16 Ɗum woni ko annabi Yo'ila wii:
17 «Laamɗo wii: E ley ɲalaaɗe cakitotooɗe ɗee mi saakan Ruuhu am e dow tagaaɓe fuu. Ɓiɓɓe mooɗon worɓe e rewɓe kaaliran hono no annabaaɓe nii, jokolɓe mooɗon njiyan ko ƴellitii e mum'en, nayeeɓe mooɗon koyɗinte.
18 Fay gollooɓe am worɓe e gollooɓe am rewɓe, mi saakan Ruuhu am dow muuɗum'en e ley ɗeen ɲalaaɗe, ɓe kaaltan konngol ngol loow-mi e maɓɓe ngol.
19 Mi waɗan kaayɗe dow kammu, mi waɗan taagumansaaji dow leydi, ɗi laatoo ƴiiƴam e yiite e cuurki.
20 Fade ɲannde gartol Joomiraaɗo mawnde teddunde ndee warde, naange niɓɓan, lewru wojjan hono no ƴiiƴam nii.
21 Nden, neɗɗo fuu nodduɗo innde Joomiraaɗo hisinte.»
22 Piyeer wii kasen: —Israa'iilankooɓe, kettinee ɗii haalaaji: Iisaa Nasaraatunke oo yo neɗɗo mo Laamɗo suɓanii on. Laamɗo hokki ɗum baawɗe, o hokki ɗum waɗude kaayɗe e taagumansaaji hakkunde mon, no onon e ko'e mon anndir-ɗon nii.
23 On ngaɗii oon neɗɗo e juuɗe bonɓe, on tontii mo e leggal bardugal, on mbaririi mo no Laamɗo muuyrunoo ɗum laatoo gila arannde nii.
24 Kaa Laamɗo wuurtinii mo, itti mo e naawalla maayde, sabi maayde ndee waawaanoo heddoraade mo.
25 Sabi Daawuuda ana haala haala makko nde wii: «Wakkati fuu miɗo yiya Joomiraaɗo, sabi omo ɲaamo am, pati mi yeryerta.
26 Saabe majjum ɓernde am seyii, ɗemngal am jaarii faa terɗe am duu mbaaltoo dow jikke,
27 sabi a yoppataa yonki am hakkunde maayɓe, a accataa Ceniiɗo maa oo ɲola.
