Golle Nelaaɓe 12:7-18

⁷Nii malaa'ika Joomiraaɗo wari e makko, suudu nduu fuu fooyni, memi mo, finndini mo, wii: —Heɲa law, imma! Non calali ɗii kumtii, iwi e juuɗe makko, caami.

⁸Malaa'ika oo wii mo: —Huma kumorgol maa, ɓoorna paɗe maa. Piyeer waɗiri non. Malaa'ika oo wii mo: —Waanda suddamaare maa, njokkaa e am.

⁹Piyeer yalti, jokki e makko. O anndaa ko malaa'ika oo waɗata, ana wa'ani mo hono no koyɗol nii, kaa ɗum goonga jaati.

¹⁰Ɓe ɓettii kayboowo arano oo, kaɲum e ɗiɗaɓo oo, ɓe njottii damal njamndi pewtungal e ngalluure ndee ngal. Ngal udditi hoore maggal yeeso maɓɓe, ɓe njalti, ɓe njokki e laawol ngol. Oon wakkati, malaa'ika oo seerti e makko.

¹¹Hakkille Piyeer warti, o wii: —Jooni mi taƴorii Joomiraaɗo neli malaa'ika muuɗum, faa hisina kam e junngo Hirudus e ko Yahuudiyankooɓe njoonndorinoo mi waɗete fuu.

¹²Nde hakkille makko jippitinoo ndee, o yehi galle Mariyama, inna Yuhanna noddirteeɗo Marka, ton yimɓe heewɓe mooɓtotonoo ana ngaɗa duwaawu.

¹³Nde Piyeer tappunoo damal galle too ndee, golloowo debbo biyeteeɗo Rode wari e damal ngal faa humpitoo.

¹⁴Nde o annditinnoo daande Piyeer ndee, o yeggiti udditinde damal ngal no o foti seyaade, o dogi o naatoyi, o humpiti ɓe Piyeer darii damal sella too.

¹⁵Ɓe mbii mo: —A kaahaango! Kaa omo heddii nanngude ɗum Piyeer. Ɓe mbii kasen: —Ɗum yo malaa'ika makko.

¹⁶Kaa ɗum fuu Piyeer ana heddii tappude. Nde ɓe udditinnoo so ɓe njii mo ndee, ɓe kaaynaa sanne.

¹⁷O huncani ɓe junngo yalla eɓe ndeƴƴinoo, o jantanii ɓe no Joomiraaɗo yaltiniri mo kasu, o wii: —Kaalanee ɗum Yaakuuba, kaɲum e sakiraaɓe woɓɓe ɓee. Caggal muuɗum, o yalti, o yehi nokku goɗɗo.

¹⁸Nde finnoo beetee ndee, sordaasi'en ɓee ana lamndondira hoto Piyeer woni, ɓe mbemmbaa faa hakkillaaji maɓɓe keli.