1 Te sogo Apolos te Korin be nanide bidibadi, Pol aga te Galesia tǫ tomoba sabolali, nosali te Efesus be naniba sabolali. Tama te bulude agai Jisasgo po wali pabo bidi me badu bidibo suali.
2 Pol agai augwali te po hanalu wali, “Polobadu sogo dagego homu Jisasba mu muani sogo, te Godigo Dwagi Yai Mobo Bidi dage pageba asaliwe?” Augwaligo te po wei agade ponoyu, te po wali, “Godigo Dwagi Yai Mobo Bidi elalubo po dago polobadu odobeo,” wali.
3 Tama Pol agai augwalibolo hanalu wali, “Tialima, te sogo augwaligo dage baptais mani sogo, dagego dego po wali pai dawe?” Augwaligo te po wali, “Jon agai we bidi baptais polobadu mayu agai ola mani po, te po bidi me deligo dabolo ola menama, dago te po wali pabo dao,” wali.
4 Tama Pol agai te po wali, “Te polobadu te we bidi augwa dwai sę me, dwai kolesaga me tagalama, tudiba menama, homu begelama, te Jon agai te we bidibolo baptais mani. Tama tilama, agai augwalibolo te po wai, ‘Te ena nosali asobo bidi, te bidi dagego homugo mu koneao,’ wali. Tama eno dagebolo te po obao, te bidi da te Jisas da,” Pol agai te po wai.
5 Tama te Efesus bulude bidali Jisasgo po wali pabo hani we bidi dabe augwaligo te po odama, augwali Jisas wali po baso, baptais sali.
6 Te baptais selama, deli deli bidi toboluba Pol agai nogo mubadi, Godigo Dwagi Yai Mobo Bidi augwaliba asali. Augwaligo gasagi yai haniani po wabo gagalali. Tama augwaligo Godigo augwalibolo mani po pusubo sę yali.
7 Tama augwali te bidi hani nogo si olama, sągą badu si wagi sulama, bidi hani bidibo.
8 Te Pol te polua sela tede bidali. Tede bidibadi, aga te Juda dabego bomo yai po ola mabo beba tigidali Sabat sogode te be tomoba pabo da. Agai augwalibolo te po wali, “Godigo homugo agai te we bidi tonalubo,” wali. Aga wi ebe, te po bomonama wai, augwaligo konemainu te po mu dao.
9 Tiali goli, augwali me badu bidi dabego augwa homude hagela elama, augwa homugo Jisas konebe. Tama augwali tigidali bidi gedude doligulama, Godigo gesi tųde pabo pobolo augwaligo dwai po wali. Tama tibaso, Pol agai te po odama, agai Jisasba homu muani bidi oda selama, te augwaligo Juda dabego bomo yai po ola mabo be taga pali. Tama tigidali sogo agai augwali dali po miani, te bidi me deli agai nogi Tiranus, tego skul be tiwaiba sisinama, po ola mani.
10 Tama Pol agai te sę ebadi, kibu be si silali. Te sę elama, umabo we bidi te Esia tǫ tomode bidibo we bidi augwaligo Godigo dwagi yai po odali. Me badu Juda hani we bidi da, me badu te Juda hani isąwai gasa hani dabe we bidi da.
11 Te sogo God agai genuai bomo mu Polbolo mani. Tama Godigo tigidali we bidibolo haniani bomai sę bidigo ebo usu isąwai sę mu ola mawai.
12 Polgo nami ugwa ugwa kugulu gudai dao, te duga holobo ugwa gebode kęwai dao. Tama augwaligo te tobage ugwa dabe Polgo tulama, tama augwaligo te gasi sai bidi dabe bidibo madigiba selasa pai dao. Augwaligo te ugwa te gasi sai bidi tigiba mubo si, te gasi sia sai dao. Te dwai haubo noma elalubo bidi dabe me, te sogo augwaligo te sę ebo si, te dwai haubo nomago te bidi dabe tagalama, wi pai dao.
13 Tama Juda genuai bidi deli bidali agai nogi Seva da. Agai sę da, te pris bidi dabe tonalubo dao. Agai ogwa da nogo a olama, me badu nogo si da. Tama augwali biliyu, te dwai haubo noma bidibo we bidi dwai noma sela sąyani. Tiali goli, augwaligo homugo Jisas mu konebe. Tama dwai noma bidi me badu sela sąyu, Jisasgo nogi ilama, sela sąwainu yali. Tama augwaligo te dwai mobobolo te po wali, “Nage dwai haubo noma, eno Jisasgo bomogo nage sela sąbo dao, te bidi Pol agai wabo po tiwai dao,” te po wai.
15 Tiali goli, te dwai mobogo augwalibolo te po wai, “Eno Jisas kone dao. Eno Pol kone dao. Tiali goli, dagego mena bomo eyu, te sę ebawe? Eno dage mu konebeo,” wali.
16 Tama te dwai mobo elalubo bidi agai te bidi dabe dali bomonama mu hwįnama, agai augwali tigidali aiyaba elaluali. Tama augwaligo tigi agai mu dolali, augwaligo ugwa dabe pebeda sąyani, te augwali te be tagalama, wi pali, tama me badu augwaligo tigi olo wi pali. Magi basowe? Te bidigo augwaligo ugwa dabe pebeda sana silai dao.
17 Tama te Efesusde bidibo Juda we bidi dabe me, te Juda hani isąwai hani we bidi me, augwali tigidaligo te yali sę po odama, wi mu yali. Augwaligo te Genuai Bidi Jisas nogi ugwaba mu sali.
18 Tama nosali Jisasgo po wali pabo we bidi me badu augwali aselama, te po te we bidi tigidalibolo wai, “Te dwai pobi wabo sę dago polobadu yai dao” wali.
19 Tama augwaligo te pobi me, animani ola mabo buku dabe deliba sisinama, augwaligo tigidali we bidi gedude isiba ulai dao. Te buku abelebo mone ge te hauwa kisu 50,000 monego abelai dao.
20 Tama umabo we bidi augwaligo te bomai sę yali po odobo si, augwaligo te Godigo dwagi yai po mu odali. Tama Godigo dwagi yai po tigidali we bidigo homuba pelama, dąų wali.
21 Te nosali augwaligo te sę ela silama, Godigo Dwagi Yai Mobo Bidigo Polgo homuba menama, aga Masedonia tǫ dali Akaia tǫ dali te bulu siba pomainu homu ilali. Tedu pelama, aga Jerusalemba sabaligi pomainu homu yali. Tama Pol agai homugo bomo eyu te po wali, “Ena teba sabaligi pelama, nosali ena Rom be nani sugi paibao,” te homu yali.
22 Tama tiali, Pol agai sę tau sabo bidi si te Masedonia tǫba tagala palali, te bidi si nogi me Timoti, me Erastus. Tama te bidi si tagala palama, Pol te Esia tǫde osogo bididuali.
23 Te bidi Pol te Efesus be nanide te sogo bidibadi, te Efesusde bidibo bidi dabe hauwa augwaligo Godigo gesi tųdu wali pabo bidi dabe dali konila po weyu, moni sębę mu yali.
24 Tama te bidi me deli, agai nogi Demitrius, agai tigidali bidi sębę ebo homu hodolali. Agai te mone sabo sę te gasagi yai bunuwali tiwai nai geselebo sę ebo bidi da, te bunuwali tiwai nai nogi silva, te wiegi yai kapa dao. Te Efesus be nanide te tibo god nogi Artemis moni lotu wabo be elaluali. Tama te bidi Demitrius me agai tau sabo bidi dabe me, augwaligo te lotu be dwasianu noma te bunuwali tiwai naigo nigibo sę elama, tama umabo bidigo sulama, moni monego abelama, sabo sę ebo da.
25 Tama te bidi Demitrius agai te tibo godigo dwasianu be sę ebo bidi dabe me, gasa sę ebo bidi dabe me, agai i olama, sisinama, te po miani. Agai te po augwalibolo tama wali, “Ama dede, dagego konebo dao, dago e sę ebogo te umabo masigi selama, da bugagia bidibo dao.
26 Tama dagego te bidi Pol agai ebo kolesaga koneani dao, dago agai po dabe me odali dao. Agai Efesusde bidibo we bidi dabebolo wabo po dabe, tama agai Esia tǫde bidibo we bidigo me agai po tama wabo da, ‘Te tobage bidigo nogogo nigibo god da, bomo menio, augwali god mu menio, agai dage tau sogobeo,’ te po walio. Agai tama po wabode tigidali we bidi augwaligo te po wali pali, te Efesus be nanide me, te Esia tǫde me.
27 Tama eno dago mone sabo sę dolidali weyu eno wi ebo, tama tigidali we bidigo dago e ebo sęde dwai po wabo. Dago bugagia tonalusąyu da, te po genuai mu yaibao. Tama augwaligo Artemisgo moni lotu be dolaibao,” wali, “agai dago moni god we, tama augwaligo homugo genuai we god Artemis usu egobeo, agai dago tigidali Esia tǫ we bidi aga deliba lotu po wabo dao, te tigidali tǫde bidibo we bidigo me,” te po wali.
