7 Te tigidali we bidi nage pąba naga sisinama, tama nago augwali tonalumainu yao.
8 Genuai Bidi, nago te tigidali we bidigo kolesaga dagalubo da. Tama tiyu, nago ena te po tųde tau sao. Magi baso meni, nago koneani, eno dwai sę me ebeo, eno te wiegi yai doloba pai kolesaga naga yai.
9 God, nage te doloba pai mu da. Nago te tigidali bidigo haliga me homu te dagalubo dao. Tialima, nago te dwai sę ebo bidi dabego dwai kolesaga ebo te tigidali silao. Tama nago te wiegi yai bidi dabego ebo dwagi yai kolesaga wei ponao.
10 God aga da, te ena tonalubo bidi da. Agai te aga po wali pabo bidi dabe tau sabo dao.
11 God te po tų dodolobo odobo wiegi yai jas bidi, tama te doloba pai po tų ebo da. Sesemane sogo agai te dwai bidi dabe aiyaba elalueibao.
12 Te dwai sę ebo bidi dabe te augwa homu begeleyu, ge nesiąbaso da, teda Godigo te aga bainat hwą dulaibao. Tama te agai enesigi balibi dolama, te hwįabo sisi elalueibao.
13 Agai augwali te sia dabo enego usu sali. Agai te bidi dabe augwali ela muabo ene dabe sisi yai elalubao.
14 Te dwai bidi suao, agai te gasa bidi dali dwai sę yabo homu beasi elalubao. Agai te tobage dwai sę yabo sisi elama, tama te sesemane sogo tibo po wabo dao.
15 Agai tǫde genuai tǫ dedage nigilama, te gasa bidi aba tulalumainu yali, tiali goli aga digi aga te nigali tǫ dedageba tulalubo dao.
16 Te tiwai naga aga te yali dwai sę tiali aga pageba ma asobo dao. Tama agai te gasa bidiba te wado me hwįyu ebogo begelama, tama aga digi aga dolaibao.
17 God te doloba pai mu da, tama tiyu, eno agaba usu da weyu, gedu haluasa po waibao. Tama te Ugwadu Mu Bidibo God nogi ugwaba selama, te eno balia po dabe waibao.
