2 Tama agai te nago we bidi dabe me, te dwai bidi dabe me, te doloba pai kolesagago tonaluaibao.
3 Nago te wiegi yai sę hauwa te augwaligo sęde pedalumainu yao. Tama nago te we bidi dabego te doloba pai kolesaga sesemane sogo emainu yao.
4 Kingo te dwai bidi dabego sęgę bugagia dodolama, tama agai te doado bage sǫą pabo bidi dabe tau somainu yao. Tama agai te gasa bidi dabeba te dwai sę yainu ebo bidi dabe elalumainu yao.
5 Te giliga me polua ula elalubadi, te naga we bidi dabego nageba lotu po omainu yao.
6 Nago te king wiegi yai bidi pedalumainu ilao, teda agai kolesaga wiegi yai eyu, te tulubage te gi nasi dabeba tulama, tama te nai wiegi yai pedalubo tiwai emainu yao.
7 Tama aga bidibo sogo te bidi dabego te doloba pai kolesaga naga wali pomainu yao. Tama te wiegi yai nai hauwa te tigidali sogo te polua pedelama elalubo sogo te pedalumainu yao.
8 Aga te king bidiyu, tama te tamu ąi pąbadu bidalubo tigidali we bidi me, te tamu ąį digibulu badu bidalubo we bidi me, te tonaluaibao. Tama agai tǫ dąį te wę Yufretisde gagalasa palama, te tigidali bulu tǫ pedaiba usu nigi paibao.
9 Te masigi kemi tǫ yai bulude bidalubo hani bage dabe, teda augwali te king dologode bidaibao. Tama aga boi bidi dabe te tǫba dolo pigulaibao.
10 Te Spen king, me te tamu ąį tomo bulu ailan king dabego, teda augwaligo agaba te wiegi yai nai presen dabe mawaibao. Tama te Arebia king me, Itiopia kingo me, teda augwaligo agaba takis mawaibao.
11 Tigidali kingo agaba kidu sugunaibao. Tama tigidali hani we bidigo te agai sę yaibao.
12 Agai te magi nai meni yai bidi dabego agaba i obaso, te agai augwali tau sabo dao. Tama te we bidi dabe te doado bage sǫą pelama, tama te tau sabo menibaso da, teda aga digi te augwali tau saibao.
13 Agai te bomo meni yai we bidi dabe te dwai bidibo, te agai augwali homu dene ebo dao. Tama te magi doado bage meni yai we bidi dabe agai augwali ma sabo dao.
14 Te dwai sę ebo bidi dabego augwali elaluama, tama augwali dolainu ebaso da, agai augwali ma siyu ebo dao. Agai augwali godolo elama, wei ebaso te tiwai eyu ebo dao.
15 Eno homugo te king te sesabi gana elama, bidimainu yao. Te Arebia dabego agaba te gol momainao. Tama te we bidi dabego Godiba gedu haluasa po weyu, te Godigo aga sesemane tau somainu yao, tama Godigo agaba te wiegi yai sę agaba emainao po wai.
16 Te yuyu me wit hauwa te we bidi dabego gide pedalumainu yao, te Lebanonde pedalubo usu tiwai. Tama te we bidi dabe te taunde hauwa pedalumainu yao, te nosa hauwa te tigidali pedaide pedalubo tiwai emainao.
