Godigo Nogi Ugwaba Sabo Tęąbi Po Wabo Buku Dabe 5:3-12 in Dadibi

³ Genuai Bidi, te tigidali sogo kigamude nago te eno gedu haluasa po odobo dao. Te giliga pedalubode eno nageba bomonama, gedu haluasa po obao, te ena ofa ebo tiwai. Tama eno te gedu haluasa po wali wei ponobo te nageba tonalubo dao.

⁴ God, te dolo isiąbo kolesagade nago te wiegi yai homu pemene me egobeo. Tama te dwai we bidi te nago augwali gesegobeo.

⁵ Nago gedude te hagoma ebo bidi dabe te dolalumainu me egobeo. Tama te dwai kolesaga ebo bidi dabe te nago godolo homu mu me isiąwaibao.

⁶ Nago te tigidali tibo po wabo bidi dolobo da. Tama bidi ela mubo bidi dabe, me te tibo po weyu, te gasa po dali ugwadu ma daganobo bidi, te nago godolo homu mu me egobeo.

⁷ Tiali goli, nago ena sesemane godolo mu ebo da. Tama ena te nago be tomoba asabo usu ebo tiwai yali. Eno te kidu sugunama, te nageba te nago tedali genuai lotu be tempel tomode lotu obaso, te usu yaibao.

⁸ God, te boi bidi hauwago ena dolainu ebao. Tama tiyu, nago eno sągą dodolobaso, teda eno nago doloba pai kolesaga wali paibao. Awe, te nago homugo ena somainu homu ebo sunumi te enaba ola mao.

⁹ Te eno boi bidi dabego te mu po dwasianu me wagobeo. Augwaligo te gasa bidi dolabo homu naga ebao. Te augwaligo pedauwali te gų page tǫ dedage dalalubo tiwai elalubao. Augwaligo te homu bega sabo po hauwade te bidi dabe dwai madiba kekebo dao.

¹⁰ God, nago augwali po tų ilama, tama augwaliba dwai dene mao. Te augwaligo dwai sę emainu sininama, te bage augwali dwai madi tula palomainao. Te augwali nago gesabidide digibulu sela sąyao, magi baso meni, augwaligo te nagede hagoma eyu, tama te dwai sę hauwa ebao.

¹¹ Tiali goli, te nago tonalubo we bidi augwali tigidali, augwa wiegi yai homu pemene yao. Augwa te bugai homu mu elama, tama te wiegi yai homu pemene ebo balia sesemane waiyąo. Nago augwali bugagia sesela sao. Tama tiyu, te nage wei mu ebo we bidi dabego nago nogi ugwaba saibao.

¹² Genuai Bidi, nago po wali pabo bidi dabeba te nago wiegi yai nai mayu ebo da. Awe, nago augwali geme dualiyu, tama augwali bugagia mu tonalu ebo da, te bidi te awago te seselaluyu, te bugagia bidibo tiwai ebo dao.