Godigo Nogi Ugwaba Sabo Tęąbi Po Wabo Buku Dabe 50:7-21 in Dadibi

⁷ Godigo te po wali, “Dage te eno we bidi da, odao. Eno po elalubao. Dage Israel dabe, eno dage po tų ilaibao. Ena naga, ena te God mu da, tama ena te dagego God dao.

⁸ Eno te dagego yali ofade te eno dageba wado po weyu me wabeo. Menio. Te sesemane sogo dagego te ofa te siaba tigidali ulubo te eno suai dao.

⁹ Tiali goli, eno te dagego obo tomode te omai bulmakau, me ma meme omai te dagego ofade sabo homu ebo meni.

¹⁰ Magi baso meni, te tigidali buside bidibo uni hasa, tama te tigidali bulu dude bidibo bulmakau me, te tigidali te eno naga dao.

¹¹ Te tigidali ba, me te busi hasa dabe me, te kala nosa bulude bilibo ba sibi me, te tigidali eno muai nai naga dao,” Godigo te po wai.

¹² “Ma, te ena nasi ebaso, te eno dageba po me wagobeo. Magi baso meni, te tǫ dali, tigidali elalubo nai, te eno naga dao.

¹³ Te eno omai bulmakau mi tubo homu ebawe? Eno te meme kaneme tubo homu yaiba, agawe? Menio.”

¹⁴ “Te dagego enaba usu da mu waiyąo, tebo te dagego yabo ofa tiwai tama. Te dagego te enaba olo mabo tigidali nai maiyabo po wali, te Ugwadu Bidibo God Mu te enaba dagego maiyąo.

¹⁵ Dagego tama tibo si, tama te sęgę pedalubo sogo, dagego enaba i waiyą, tama te eno dage tau mu siyu, tama dagego eno nogi ugwaba sagameo,” po wali.

¹⁶ Tiali goli, Godigo te dwai sę ebo bidi dabeba te tama po wali, “Magi baso te dagego eno bomai po tigidali nogibo dawe? Tama magi baso te dagego eno dąų wali bomai pode te po mibo dawe?

¹⁷ Te eno dage dodolobo te dagego hagela homu eyu, tama dagego eno po sesemane sela sąbo sę ebo dao.

¹⁸ Dagego te nai wi sabo bidi dabe sulama, tama dage augwa abagi pedelali. Tama dage te we sabo sę dolama, tama te penani sę ebo we bidi dabe dali munasa, biliyu yai.

¹⁹ Dagego te dwai po, me te tibo po sesemane sogo wabo sę ebo dao.

²⁰ Tama dagego te duga ama dabe po tų ilibo sę eyu, tama dagego augwaliba te posobo weyu ebo dao.

²¹ Dagego te tiwai yali, tama eno po deli me wabeo. Tama dagego te ena te dage tiwai tobage da homu yai. Tiali goli, mu menio. Megi eno dageba wado po olama, tama dage te pepeli diliba sela munama, te po tų ilaibao,” wali.