2 Ena te aiyaba mu igulai genuai dedage tomode bidibo bidi tiwai bidiyu, tama ena dolainu ebaso, tama Genuai Bidigo ena kegelama, tama ena ugwaba holali. Ena te pu węde mu dąų olama, tama tego ena tola sai elalu, tama Genuai Bidi agai ena tedu gudulama, tama ena te masigi elalubo madiba dodolama, tama ena bomonama ma pai dao.
3 Agai te gesi tęąbi po me deli enaba mani, te agaba konealubo homu dąų wabo God nogi ugwaba sabo tęąbi po dao. Te bidi hauwago te agai enade yali sę po odolama, tama augwa wi elama, tama augwa te Genuai Bidiba konealubo homu dąų omainu yaibao.
4 Bidigo konealubo homu te Genuai Bidiba dąų wabo bidi da, te aga wiegi yai homu pemene yao. Te hagoma ebo bidi dabe wali pisąbo bidi tiwai, tama te Genuai Bidi me tagalisiąma, tama te tibo god dabeba lotu po me wagobeo. Mu menio.
5 Genuai Bidi, eno God, nago te da tau sabo sę wiegi yai hauwa yali. Te nage tiwai bidi me elalubeo. Nago augwali aiyaba mu elaluali. Eno te bidi dabeba po pusuyu, tama nago sę me homude po weyu da, ya tegobao! Te umabo umabo mu yaibao. Eno nedebaso, usu me egobeo.
6 Nago te augwaligo elama ofa ebo kibu dabe te wei ebeo. Te tobage augwaligo te siaba tigidali ulama domainu te sęgę sela sąbo ofa, te me nago wei me isiąwai. Tiali goli, nago eno homu hodolobaso, tama eno nago po wali pabo dao.
7 Tialima, megi eno e tama obao, “Suao. Ena asalio. Te nago bomai po elalubo bukude nago homugo te eno emainu yabo sę asęanio.
8 Eno God, eno te nago homu wali pabo wei mu ebao. Te nago bomai po te ena haliga tomode elalubao.”
9 Genuai Bidi, eno te nago bukude po pusubo sę te nago we bidi dabe sisinibo tomode wai dao. Eno te tama po wai, “Genuai Bidigo te da ma sabo dao.” Genuai Bidi, nago koneani, eno te po sesemane pusaibao. Eno pedauwali me pania sogobeo.
10 Nago ena tau selama, tama ena ma sali, tama te eno me geme dualubeo. Te nago naga mu po te wali pelama, tama te nago da ma sabo da po eno pusalio. Nago te tigidali we bidi wei mu eyu, tama nago mu kolesaga wali pobaso, tama eno te lotu wainu sisinibo we bidi dabeba eno me dualubeo. Menio, eno augwaliba wai dao.
11 Genuai Bidi, eno koneani, te nago homu dene eyu, tau sabo sę ebo te palia sogobeo. Menio, nago ena sesemane sogo homu ebo dao. Nago ena wei eyu, tama naga mu po te wali peyu, tama tebo kolesagade te nago ena sesemane sogo tonalubo dao.
12 Te sęgę hauwa enaba pedelali, tama te augwali eno nedebaso, usu egobeo. Te dwai kolesaga dabe eno yali, tego ena aiyaba elalualio, tama eno bugagia me tonono me ebeo. Te dwai kolesaga hauwa mu pedelama, tama te eno tobolude elalubo tobolu nisi namba te aiyaba elaluai. Eno homu kolesaga tigidali tuloluai, tama ena bomo meni yai dao.
13 Genuai Bidi, ao, te nago ena ma sao. Genuai Bidi, te nago ena polo tau sao.
14 Te bidi mebago ena ela muainu ebao. Nago augwali elalu, tama augwali homu kone mu tuą palama, te augwali dwai hale somainao. Te bidi dabego eno sęgęde wiegi yai pemene ebao, nago augwali ma sela sąnama, tama augwali te elaluao.
15 Te bidi dabego enaba posobo po weyu, kęnę wali. Nago augwali te hale mu elalumainu yao, te augwa yali kolesagade dwai midigi mu somainu yao.
16 Tiali goli, eno homugo te nage koneani bidi dabego da, augwa te nageba wiegi yai pemene eyu, tama bugai homu elama bidaibao. Te nage godolo mu idubo we bidi dabe, te nago augwali ma sao, augwa te po omainu yao, “Genuai Bidi te polalubo bidi mu da,” omainao.
17 Tiali goli, ena te bomo meni yai bidi, tama ena te tigidali doado bage sǫą pai elalubao. Tama nage, Genuai Bidi, nago ena homu koneani. God, nago digi nago ena tau sabo bidi da, tama nago ena ma sabo dao. Nago me tonalugio, nago ena polo tau sao.
