2 Dago Genuai Bidiba usu da waiyąo. Agai te tigidali tibo god aiyaba elaluai. Sesemane sesemane sogo agai da wei mu ebo dao.
3 Dago usu da po te Genuai Bidiba wao. Agai te tǫde genuai bidi tigidali aiyaba elaluali. Agai da sesemane bidada pabo sogo wei mu ebao.
4 Agaduba deligo te genuai sę te bidigo me isiąwai bomai sę dabe ebo dao. Agai da sesemane bidada pabo sogo wei mu ebo dao.
5 Te aga koneani kolesagade digi agai te dagalu nigilama, te ugwadu elalubo nai dabe me nigalio. Sesemane bidada pabo agai da wei mu ebao.
6 Agai te tǫ ugwadu munama, tama te wę dabe aiyadu elalubao. Agai da sesemane bidada pabo sogo wei mu ebo dao.
7 Agai te giliga me, polua me, nigali. Sesemane bidada pabo sogo agai da wei mu ebo dao.
8 Agai te be posobo sogo te ulade te giligago tonalumainu ilali. Agai da sesemane bidada pabo sogo wei mu ebao.
9 Agai te polua me hǫ dabego te be hulia sabo sogode tonalumainu ilali. Agai da sesemane bidada pabo sogo wei mu ebo dao.
10 Agai te Isip dabego gomunai ogwa dabe ela muani. Te sesemane bidada pabo sogo agai da wei mu ebo dao.
11 Agai te Israel dabe odasa peyu, tama augwaligo te Isip taga palio. Agai da sesemane bidada pabo sogo wei mu ebo dao.
12 Te agai genuai bomogo digi, agai augwali odasa palio. Sesemane bidada pabo sogo agai da wei mu ebo dao.
13 Agai te nosa elaluali tamu ąį te si badu peda somainu bugulali. Agai da sesemane bidada pabo sogo wei mu ebo dao.
14 Aga polasa peyu, tama aga we bidi dabe odasa peyu, tama augwali te tamu ąį nogealio. Agai te sesemane bidada pabo sogo da wei mu ebo dao.
15 Agai te Fero me, aga ami bidi dabe dali, te wę tulama tama isimainu ilalio. Agai sesemane bidada pabo sogo da wei mu edubao.
16 Te aga we bidi dabede aga te wa pai bulude polasa palio. Agai da sesemane bidada pabo sogo wei mu ebao.
17 Agai te bomai king dabe ela muani. Agai da sesemane sogo wei mu eyu, tama tialio.
18 Tama agai te genuai nogi elalubo king dabe ela muai. Agai da bidada pabo sogo sesemane wei mu eyu, tiali.
19 Agai te Sihon ela muai, te Amor dabego king dao. Te sesemane bidada pabo sogo agai da wei mu ebo dao.
20 Tama agai te Ok elali, te Basan bulu king bidi dao. Te agai sesemane bidada pabo sogo da wei mu ebo dao.
21 Tama agai te king dabego tǫ te aga we bidi dabeba mawai. Te agai sesemane bidada pabo sogo da wei mu ebo dao.
22 Agai te tǫ te Israel dabeba mawai, te aga sę bidi dabeba mawai dao. Agai te bidada pabo sogo sesemane te da wei mu ebo dao.
23 Te boi bidi dabego da aiyaba elalubo sogo, agai dade homu kone me elaludalio. Te agai bidada pabo sogo sesemane da wei mu ebo dao.
