4 Hina Bagadedafa! Di da moloidafa hou bagade hanai gala. Di da Isala:ili amo ganodini Dia moloi fofada:su amo huluane dawa:digima:ne ligisi. Di da moloidafa amo defele oule misi.
5 Ninia Hina Godema nodone sia:ma! Ea hadigi fisu midadi amodili Ema nodomusa: gilisima! E da Hadigidafa!
6 Mousese amola Elane, ela da Ea gobele salasu dunu galu, amola Samiuele da Ema sia:ne gadosu. Ilia da Hina Godema wele sia:beba:le, E da ilima dabe adole i.
7 E da mu mobi ganumu amogaini ilima sia:i. Ilia da Ea sema amola hamoma:ne sia:i, amo huluane fa:no bobogei.
8 Na Hina Gode! Di da Dia dunu ilima dabe adole i. Di da ilima, ilia wadela:i hou hamobeba:le se bidi i. Be amomane Di da Gode amo da gogolema:ne olofosu dawa:, amo ilima olelei dagoi.
