21 Na gasa da eso huluane e amola gilisili lalumu. Na nimi hou amoga e da gasa bagade heda:mu.
22 Ema ha lai dunu ilia da ema hasalimu da hamedei ba:mu, amola wadela:i hamosu dunu, ilia da e hame hasalasimu.
23 Na da ea ha lai dunu amo fane dadega:le fofasimu amola ema higale ba:be dunu amo huluane fane lelegemu.
24 Na da ema asigilalumu amola ema madelagimu. Na da ema eso huluane ea hasalasisu fawane hamonanoma:mu.
25 Na da ea hina bagade hou amo Medidela:inia hano wayabo bagade amogainini, Iufala:idisi hanoga alofele galesimu.
26 E da Nama amane sia:mu. “Di da na Ada amola na Gode, amola Di da na gesu amola na gaga:su.
27 Hina dunu bagohame amo ganodini, Na da ema Na magobo mano hamomu.
28 Na da Na hamomusa: ema ilegele sia:i da eso huluane dawa:i dialumu, amola Na da gousa:su ema ilegele sia:i da mae fisili amanewane dialumu.
29 Ea sosogo fi da mae mumugululi, muagado haisewe agoaiwane dialumu. Egaga fifi manebe da eso huluane hina bagade dunu hamonanusu hamomu.
30 “Be ilia da Na sema amo hame fa:no bobogesea, amola Na hamoma:ne sia:i amo hame hamosea,
31 Ilia da Na sema amo hame nabasea, amola Na hamoma:ne sia:i amoma hame fa:no bobogesea,
32 amasea, Na da ilia wadela:i hou amo dabe ilima se bidi imunu. Ilia da giadofale hamoiba:le, Na da ilima se bidi iabeba:le, ilia da se naba hahaninanumu.
33 Be amomane Na da Da:ibidima asigi hou da hame yolesimu amola Na ema hamomusa: ilegele sia:i da hame yolesimu.
34 Na ema gousa:su da hame yolesimu, amola ema Na da hamomusa: ilegei amoga hodo afadafa Ni hame lalegamu.
35 “Afae dafawane, amo huluane Na da Na malei Dioba:le ilegele sia:sa. Na da Da:ibidima hamedafa ogogomu.
36 E da eso huluane egaga fifi ahoanumu, amola Na da ea hina bagade hawa: hamosu amo ganodini eso digaga:la:be galu, ema sosodo lelumu.
37 Oubi da muagadodili mae fisili lela. Amo defele Da:ibidi egaga fi da Isala:ili ouligisa esalumu.”
38 Be amomane Di da dia ilegei hina dunuma ougi galebe, Di da e yolesiaga:le, e gogolei dagoi galebe.
