1 Hina Gode, na da eso huluane Dia mae fisili asigi hou amoga ligiagale gesami hea:lumu. Na da mae fisili Dia didili hamosu hou amo fifi asi gala huluanema adodolalumu.
2 Na dawa:, Dia asigidafa hou da mae fisili eso huluane dialumu. Amola Dia didili hamosu hou da bagadedafa amola fisimu hamedei muagado haisewe agoai dialumu.
3 Di da amane sia:i, “Na da Ni ilegele fi dunu amo anisu gaguli gousa:i dagoi, amola Na da Na hawa: hamosu dunu Da:ibidi, ema hamomusa: ilegele sia:i dagoi.
4 ‘Digaga fifi ahoanebe amoga da eso huluane hina bagade dunu hamonanumu. Na da mae fisili dia sosogo fi amoga enoga wadela:lesisa:besa:le gaga:lalumu.’”
5 Hebene da Dia noga:i liligi hahamoi amoga gesami hea:sa, amola hadigidafa a:igele dunu da Hina Gode Dia didili hamosu amoga gesami hea:sa.
6 Hina Gode, Hebene amo ganodini da Di agoai afae hame gala. Hebene amo ganodini galebe liligi amoga da Dila defemu afae hamedafa.
7 Amola a:igele gasolo ilia hadigi malei sesei amo ganodini ilia da Dima beda:sa, amola ilia huluane da Dima sosodo aligi diala.
8 Hina Gode Bagadedafa, bagadedafa Di agoai afae da hame gala. Hina Gode, Di da liligi huluanedafa amoma moloidafa ba:sa.
9 Di da hano wayabo gasa bagade amo ouligisa. Di da hano ea gasa bagade gafulusu amo asabolesisa.
10 Di da ohe bagadedafa, La:iha:be, amo Di gasa bagadedafa amoga fane dadalega:le salalu, amola Dia ha lai dunu hasalasi.
11 Hebene amo da Dia:, amola osobo bagade amola liligi huluane amo ganodini diala amo da Di fawane hahamoi.
12 Di da ga (north) amola ga (south) amo hahamoi. Dabo goumi amola Hemone goumi da Dima nodone gesami hea:sa.
13 Dia nimi da bagadedafa gala! Dia gasa da baligili bagadedafa!
14 Dia Hinadafa hou da moloidafa hou, moloidafa fofada:su hou, asigi hou amola dafawaneyale dawa:su hou amo da:iya bugiba:le, Dia hamobe hou huluane da noga:le olelesa.
15 Dunu ilia da Dima nodone gesami hea:beba:le, hahawane bagadedafa gala, amola ilia da Dia hadigi amola asigisu amo ganodini esala agoane hamosa!
16 Bai ilia da yoga eso huluane Dima, Dia noga:idafa hou amoga nodone sia:nana.
17 Di da ninima hasalasisu hou bagadedafa i. Dia asigidafa hou amoga Di da ninima hasalasisu i.
18 Di, Hina Gode, Di fawane da ninia gaga:su dunu ilegei. Di, Isala:ili ilia Hadigidafa Gode da ninia hina bagade ninima i.
19 Di, Hina Gode, Di da mae fisili noga:idafa hawa: hamosu dunu, esala ba:su ganodini ilima amane sia:i, “Na da mimogo dadi gagui dunuma fidima:ne ilegei dagoi. Na da Isala:ili fi dunu amoga ouligisu dunu ilegei.
20 Na da Na hawa: hamosu dunu Da:ibidi ea dialuma da:iya malei susuligi sogagala:lu, e hina bagade dunu hahamonesi.
21 Na gasa da eso huluane e amola gilisili lalumu. Na nimi hou amoga e da gasa bagade heda:mu.
22 Ema ha lai dunu ilia da ema hasalimu da hamedei ba:mu, amola wadela:i hamosu dunu, ilia da e hame hasalasimu.
23 Na da ea ha lai dunu amo fane dadega:le fofasimu amola ema higale ba:be dunu amo huluane fane lelegemu.
24 Na da ema asigilalumu amola ema madelagimu. Na da ema eso huluane ea hasalasisu fawane hamonanoma:mu.
25 Na da ea hina bagade hou amo Medidela:inia hano wayabo bagade amogainini, Iufala:idisi hanoga alofele galesimu.
26 E da Nama amane sia:mu. “Di da na Ada amola na Gode, amola Di da na gesu amola na gaga:su.
27 Hina dunu bagohame amo ganodini, Na da ema Na magobo mano hamomu.
28 Na da Na hamomusa: ema ilegele sia:i da eso huluane dawa:i dialumu, amola Na da gousa:su ema ilegele sia:i da mae fisili amanewane dialumu.
