1 Gode! Hina bagade da Dia moloidafa hou defele fofada:su hou hamoma:ne, Dia ema olelema. Dia moloidafa fofada:su hou amo egefema ima!
2 Amasea, e da moloiwane Dia fi dunu ouligimu. Amola e da banenesi dunu ilima moloidafa ouligimu.
3 Isala:ili soge da bagade gaguiwane dialumu. Amo ganodini, moloidafa hou fawane da dialumu.
4 Hina bagade da hame gagui dunuma molole fofada:mu. E da hahani hame gagui dunu amo fidimu, amola ilima banenesisu dunu amo hasalimu da defea.
5 Eso da digagala:sea, amola oubi da digagala:sea, eso huluane manebe amoga, dia fi dunu da dima nodonanumu.
6 Hina bagade da gibu amo da bugili nasu sogega dabe defele ba:mu. Amola e da gibu soge da:iya dabe agoai ba:mu.
7 E da osobo bagadega esalea, moloidafa hou salusaluiwane heda:lebe ba:mu. Amola oubi da eso huluane mae fisili diga:lebe, amo defele ea soge ganodini bagade gagui hou dialoma:ma!
8 Isala:ili hina bagade ea ouligibi soge da hano wayabo bagade la:idi bega: asili la:idi bega: doaga:mu. Amola Iufala:idisi hano amogawi asili osobo bagade sinado la:idi asili eno sinado amoga doaga:mu.
9 Hafoga:i soge ganodini fi dunu da ea midadi begudumu. Ea ha lai dunu da ili gobele osoboga gala:la sa:imu.
10 Siba:ini hina bagade dunu ilia amola ogaga esalebe hina bagade, ilia da ema iasu imunu. Ala:ibia amola Idioubia hina bagade dunu ilia da ema iasu gaguli misunu.
11 Osobo bagade hina bagade dunu huluane, ilia da ea midadi begudumu. Fifi asi gala dunu huluanedafa da ea hawa: hamosu hamomu.
12 E da hame gagui dunu amo da ema webe, amo gaga:sa. Amola e da hahani hame gagui dunu, amola dunu amo da eno dunuga fisiagai, amo gaga:sa.
13 E da gasa hame amola hame gagui dunu ilima asigisa. E da hahani hame gagui dunu ilia esalusu gaga:sa.
14 Ilia da enoga banenesisa:besa:le amola enoga fasa:besa:le, e da ili gaga:sa. Bai e da ilia esalusu amoma asigisa.
15 Hina bagade da gebewane sedagili esalumu da defea. Ala:ibia dunu ilia da ema gouli imunu da defea. Dunu huluane da eso huluane e fidima:ne sia:ne gadomu. Amola eso huluane mae fisili ema nodolalumu.
