20 Ilia da nama bagadewane gadebeba:le, na da gala:la sa:i agoai ba:sa. Na da heawi agoai diala. Na da eno dunu ilia da nama asigimu, na da dawa:i. Be ilia da nama hame asigi galu. Ilia da na dogo denesima:ne, na da hanai galu. Be agoane hame ba:i.
21 Na da ha:i galea, ilia da nama bogoma:ne ha:i manu iasu. Na da hano hanai galea, ilia da nama wadela:i gamoga:i waini hano iasu.
22 Ilia lolo nasu da ili wadela:lesimu da defea. Ilia hamoma:ne sia:i lolo nasu da ilila: dafama:ne hamomu da defea.
23 Gode! Dia ilia si wadela:lesima! Ilia baligi eso huluane gasa hamedenesima!
24 Dia ougi hou ili da:iya soga:sima! Dia ougi hou da ilima baligili heda:ma:ma!
25 Ilia fisisu sogebi da dunu hamedene ba:mu da defea! Ilia abula diasu ganodini, dunu afae esalebe hame ba:mu da defea!
26 Ilia da dunu ilima Di da se iasu, ilima baligili se iaha. Ilia da dunu amo Dia da fa:ginisi, amo ilia se nabasu ba:beba:le, oufesega:ne sia: daha.
27 Ilia wadela:i hou hamoi huluane dedene sa:i dialoma! Dia gaga:su amoga ilia afae mae lama:ma!
28 Ilia dio Fifi Ahoanusu Meloa amo ganodini dedei dialebe, amo fadegama! Dia fi ilia dio dedei, amoga ilia dio mae dialoma:ma!
29 Be na da heawini se bagade naba. Gode! Na gaguia gadole, amola na gaga:ma!
30 Na da Godema nodone gesami hea:mu! Na da Ema nodobeba:le, Ea gasa bagade hou eno dunuma sisia:i lamu.
31 Hina Gode da bulamagau gobele salasu amola bulamagau gawali noga:le dei, amo gobele salasu hahawane ba:sa. Be na da Ema dafawane nodosea, E da amo hou da ohe gobele salasu amo baligisa ba:sa.
32 Banenesi dunu da amo hou ba:sea, hahawane ganumu. Dunu amo da Godema nodosu da amo hou ba:sea, dogo denesi dagoi ba:mu.
33 Hina Gode da liligi hame gagui hahani dunu amo ilia adole ba:su naba. E da Ea dunu amo da afugi diasu ganodini esalebe, hame gogolesa.
34 Hebene amola osobo bagade amola hano wayabo bagade! Amo ganodini esalebe liligi huluane! Godema nodoma!
35 E da Yelusaleme moilai bai bagade gaga:mu! E da Yuda moilale gagai huluane bu gagumu. Ea fi dunu da amogawi esalumu, amola ilia da Isala:ili soge gaguli fimu.
36 Hina Gode Ea hawa: hamosu dunu iligaga fi dunu da amo soge, nana agoane lamu. Amola dunu amo da Ema asigi, ilia da amogai esalumu.
