16 Dilia da abuliba:le dilia bagadewane agesone fisiagagadoi goumi amoga Gode Ea esalebe goumi (Saione) amo higale ba:sala:? Bai amogawi (Saione Goumi) Hina Gode da eso huluane fifi ahoanumu.
17 Hina Gode amola Ea gasa bagade ‘sa:liode’ osea:idafa, da Sainai Goumiga misini, Malei Sesei amo ganodini golili daha.
18 E da gadodafa heda:le, doagala:le fedele lai dunu bagohame amo oule heda:sa. Osobo bagade lelesu dunu da Ema hahawane dogolegele liligi iaha. Hina Gode da gadodafa sogebi amoga esalumu.
19 Hina Godema nodoma! E da ninia dioi bagade agui liligi eso huluane aguni ahoa. E da Gode amola E da nini gaga:sa.
20 Ninia Gode da Gaga:su Gode! E da Hina Gode, ninia Hina Gode! E da nini mae bogoma:ne gaga:sa!
21 Gode da Ea ha lai dunu, amo da mae fisili gebewane wadela:i hou hamonana, E da ilia dialuma goudamu.
22 Hina Gode da amane sia:i dagoi, “Na da dilia ha lai dunu Ba:isia:ne Goumia esala, amo bu oule misunu. Dilia ha lai dunu hano wayabo bagade luguduga diala, amo Na da bu oule misunu.
23 Amasea dilia da ilia maga:me degemu. Amola dilia wa:me ilia da ilia hanaiga defele ilia maga:me heloa:mu. Amo da Gode (na
24 Gode! Dunu huluane da Dia hasalasu mogodigisu ba:sa. Amo da Gode (na Hina Bagade) Ea Hadigi Sogebi ganodini masa:ne mogodigisu.
25 Gesami hea:su dunu da bisili ahoa amola gesami hea:su dusu dunu amo da fa:no mogodigisa. Amola dogoa da uda a:fini da gulaga hamoi ilibu beano amo dusa mogodigisa.
26 Gode Ea fi dunu ilia gilisili sia: dasu amo ganodini, Ema nodone sia:ma! Dilia Ya:igobe egaga fifi manebe! Dilia huluane Hina Godema nodone sia:ma!
27 Bisili da Bediamini ea sosogo fi fonobahadi amo maha. Amalu da Yuda fi hina dunu da ilia sosogo fi amo bisili maha. Amo baligiga da Sebiulane amola Na:fadalai elea hina dunu ilia maha.
28 Gode! Di da Dia gasaga nini fidi galu. Amo gasa ninia ba:ma:ne olelema!
29 Osobo bagade hina bagade dunu da Di amo Dia Yelusaleme Debolo Diasuga esala, amoga hahawane dogolegele iasu Dima iaha. Amoga Dia gasa bagade hou olelema!
30 Idibidi fi da fedege agoane, sigua ohe saga: ganodini esala agoane ba:sa. Ilima gagabole sia:ma! Fifi asi gala eno da fedege agoane bulamagau gawali amola ilia mano agoane ba:sa. Ilima gebewane gagabole sisia: ahoaneawane, ilia Dima beguduli ilia silifa Dima ia dagoiba:le fawane yolesima. Dunu amo da gegemusa: hanai gala, ili huluane afagogolesima!
31 Alofele sia:ne iasu dunu da Idibidi sogega misi dagoi ba:mu. Suda:ne dunu ilia da lobo gaguia gadole Godema sia:ne gadomu.
