4 Di da ogogosu dunu! Di da dia sia:ga eno dunu se nabima:ne hanasa.
5 Amaiba:le Gode da di eso huluane amane dialoma:ne wadela:lesimu. E da di gaguli, dia diasu amoga di mae esaloma:ne di fadegale fasimu. E da di medole legemu.
6 Moloidafa dunu da amo hou ba:beba:le, beda:mu. Amasea, ilia da dima oufesega:ne, amane sia:mu,
7 “Ba:ma! Amo dunu da Godema gaga:su lama:ne hame asi. Be e da ea bagade gagui hou amola ea wadela:i hou amoga e gaga:ma:beyale dawa:i.
8 Be na da olife ifa Gode Ea diasu ganodini heda:lebe, agoane ba:sa. Na da Ea maedafa fisili asigidafa hou amo dafawaneyale dawa:lala.
9 Gode! Na da eso huluane Dia nama hamobe amoba:le Dima nodone sia:nana. Amola Dia fi dunu ilia si da:iya, Dia noga:idafa hou amo olelelalumu.
