3 Dilia! Hina Gode Ea hou dafawaneyale dawa:le, moloidafa hou hamoma! Soge amoga fifilale, gaga:iwane esaloma!
4 Hina Gode Ea hou amo ganodini hahawane hou hogoi helema! E da dia dogoga, hanasu hou hamoma:mu.
5 Dina: disu Hina Godema ima, amola Ema dafawaneyale dawa:ma! Amasea, E da di fidimu.
6 E da dima moloidafa hou hahamonesimu. Amola Ea hamobeba:le, di da esomogoa eso diga:be agoai ba:mu.
7 Hina Gode Ea hanaiga hamoma:ne, ha:aligima! Wadela:i dunu ilia da liligi bagade gagusia, amola hahawane wadela:i ilegesu hou amo hamosea, mae da:i dione ba:ma.
8 Da:i dione amola ougili mae hamoma! Amoga da bidi hamosu fawane ba:mu.
9 Be nowa dunu ilia da Hina Godema dafawaneyale dawa:sea, ilia fawane da osobo bagade ouligimu. Be wadela:i hamosu dunu da gadili sefasi dagoi ba:mu.
10 Wadela:i hamosu dunu da hedolowane alalolesi dagoi ba:mu. Dia da ili hogoi helemu, be hame ba:mu.
11 Bodogi dunu da osobo bagade ouligimu. Amola bagade gaguiwane amola olofoiwane esalebe ba:mu.
12 Wadela:i hamosu dunu da noga:le hamosu dunu amo wadela:lesimusa: ilegesa, amola ema higale ougili ba:sa.
13 Be Hina Gode da wadela:le hamosu dunu iliba:le, ousa. Bai E dawa:. Ilia da hedolowane gugunufinisi dagoi ba:mu.
14 Wadela:i hamosu dunu da hame gagui dunu amola moloidafa hamosu dunu medole legemusa:, ilia gegesu gobihei amo duga:le gadosa, amola ilia oulali disa.
15 Be ilia da ilila: gegesu gobihei amogawane ilila: fane legei dagoi ba:mu. Amola ilia oulali da fifili sali ba:mu.
16 Moloidafa dunu ea fonobahadi gagui da wadela:i hamosu dunu huluane ilia bagade gagui amo baligisa.
17 Bai Hina Gode da wadela:i hamosu dunu ilia gasa fadegale fasimu. Be E da molole hamosu dunu ili gaga:mu.
18 Hina Gode da Ea sia: nabawane hamosu dunu amo noga:le ouligisa. Amola Ea nana liligi da eso huluane ilia: fawane dialumu.
19 Wadela:i eso da doaga:sea, ilia da se hame nabimu. Ha:i da doaga:sea, ilia da hame ha:gia:mu.
20 Be wadela:i hamosu dunu ilia da bogogia:mu. Hina Godema ha lai dunu, ilia da mosoi gilidabe defele gilisa:i dagoi ba:mu. Mobi da hedolowane geale asi. amo defele ilia da hedolowane alalolesi dagoi ba:mu.
