4 Dia hawa: hamoi amoma fifi asi amola fifi misunu da nodomu. Ilia da Dia gasa bagade hamosu amo eno dunuma wele sia:mu.
5 Ilia da Dia hadigidafa hou dawa:le, gilisili sia: sa:imu. Amola na da Dia noga:idafa hamosu, na asigi dawa:su ganodini dawa:lalumu.
6 Dunu eno da Dia gasa bagade hawa: hamosu, amo gilisili sia: sa:imu. Amola na da Dia noga:idafa bagade hou amo eno dunuma wele sia:mu.
7 Ilia da Dia noga:idafa hou olelemu, amola Dia asigidafa hou olelema:ne, gesami hea:mu.
8 Hina Gode da asigidafa amola gogolema:ne olofosu dawa:. E da hedolo hame ougisa amola mae fisili asigidafa hou dawa:.
9 E da dunu huluanema noga:idafa hou hamosa. Amola Ea hahamoi liligi huluane amoma asigisa.
10 Hina Gode! Dia hahamoi liligi huluane da Dima nodomu. Amola Dia fi dunu huluane ilia da Dima nodone sia:mu.
11 Ilia da Dia hadigi Hina Bagade Hou amo dawa:le, gilisili sia: sa:imu. Amola Dia gasa bagade hou eno dunuma olelemu.
12 Amasea, dunu huluane ilia da Dia gasa bagade hawa: hamoi amola Dia hadigi Hinadafa Hou dawa:mu.
13 Dia Ouligibi da eso huluane dialalalumu. Amola Di da eso huluane Hinadafa esalumu. Hina Gode da hamomusa: ilegele sia:i, amo mae fisili, didili hamosa. E da Ea hawa: hamosu huluane amo ganodini asigidafa hamosa.
14 E da se nababe dunu fidisa. E da dafai dunu bu wa:lesisa.
