4 Inai murinai Abela danu ese iena mamoe, vara guna gaudia, digara gaudia ia mailaidia. Ia aladia, bona vamu namona gaudia ia henia, boubou gauna totona. Lohiabada ese Abela ena harihari gauna dekenai ia moale,
5 to Kaino, mai ena boubou gauna ia abia dae lasi. Kaino be ia badu maragi lasi, bona badu dainai iena vairana ia metau.
6 Lohiabada ese Kaino dekenai ia gwau, “Badina be dahaka oi badu noho? Badina dahaka oiemu vairana ia metau noho?
7 Bema kara namo oi karaia vadaeni, be oiemu boubou do lau abia dae. To dika oi karaia vadaeni dainai, kara dika be oiemu iduara dekenai ia naria noho, oi do ia hadikaia totona. Kara dika be ia ura biagua oi, to oi ese do oi halusia be namo.”
8 Bona Kaino ese iena tadina Abela dekenai ia hereva, ia gwau, “Uma gabu dekenai ita raka namo.” Ruaosi idia noho uma gabu neganai, Kaino ese iena tadina Abela dekenai ia heatu, ia alaia mase.
9 Lohiabada ese Kaino ia nanadaia, ia gwau, “Oiemu tadina Abela be edeseni?” Ia haere, “Lau diba lasi. Be, lau be egu tadina ena naria tauna, a?”
10 Vadaeni Lohiabada ia gwau, “Dahaka kara dika oi karaia vadaeni? Oiemu tadina ena rarana be tano dekena amo ia boiboi noho lau dekenai, iena mase davana do lau karaia totona.
11 Harihari dika ia mai oi dekenai, bona inai tano do oi rakatania momokani. Badina inai tano ese oiemu tadina ena rarana ia ania, oi ese oiemu tadina oi alaia neganai.
12 Bema uma gabu lalonai hadoa gaukara oi karaia, tano ese iena anina do ia henia lasi oi dekenai, bona dohore oi be ruma lasi, bona loa kava tauna tanobada dekenai do oi lao.”
13 Bona Kaino ese Lohiabada dekenai ia hereva, ia gwau, “Lauegu dika davana be metau herea.
14 Inai tano bona oiemu vairana dekena amo lau oi lulua noho. Lau be ruma lasi bona loa kava tauna do lau lao tanobada dekenai, bona sedira lau idia davaria taudia ese lau do idia alaia mase.”
15 To Lohiabada ese Kaino dekenai ia haere, ia gwau, “Lasi momokani. Kaino ia alaia tauna dekenai be davana do lau henia nega tamona lasi, to nega 7.” Vadaeni, Lohiabada ese Kaino dekenai maka ta ia atoa, tau ta ese ia davaria neganai, do ia alaia lasi totona.
16 Bona Kaino ese Lohiabada dekena amo ia raka siri, bona tano ta ladana Loa Kava, Eden ena dina ia daekau kahana dekenai ia noho.
