6 Kenè nu iselikwey is ketau, kekenà, mahala nu heini su iyan heini ebantey wey ed-elima kenikew.
7 Is ketau etawa is kedsavut iyan utew impurtanti he kinahanglan te etew, umbe penigudu ka wey nu maangken heini minsan maamin pa is langun he azen nu.
8 Mahala nu utew wey tipiǥi nu is ketau, ne pinaaǥi kayi egkevantug ka.
9 Iring heini te kuruna he menge vulak he ebpekeveǥey kenikew te kekempet wey zengeg.”
10 Mama, pemineǥa nu wey tumana nu is menge egkeǥiyen ku su wey ka luǥeyazi te untung.
11 Mibpenurù ku en sikew ke ebmenmenuwen is kebpengungubpaan he egkezumahan te ketau wey kebpurungpurung.
12 Emun edtumanen nu heini, wazà egkehimu he velavag te kebpengungubpaan nu, wey wazà mezaat he egkehitavù kenikew.
13 Pekezeseni nu te egawed is penurù ku; kenè nu ituǥut he maawà diyà te kenikew, pekeventayi nu su iyan heini untung nu.
14 Kenè nu iringi is menge vaal te menge lalung.
15 Likayi nu heini ne pedeyuna nu is metazeng he kebpengungubpaan.
16 Su kenè dan ebpekelipezeng emun kenè dan pa ebpekevaal te mezaat etawa ebpekependelahig te zuma.
17 Is mezaat he menge ulaula wey is kebpesipala, impeiring dan te keenen wey inumen.
18 Is kebpengungubpaan te menge etew he metazeng ne igkepetug-iring te aney en he kedsilà te andew ke egkepawà he ebmerayag taman te meudtu.
19 Ne is kebpengungubpaan mulà te menge etew he mezaat is menge ulaula zan, igkepetug-iring te utew merusirem, ne kenè dan egketuenan ke hengkey is hinungdan te kegkezeeti kandan.
20 Mama, purungi nu pemineǥa is menge penurù ku kenikew.
21 Tentenuzi nu heini, ne tipiǥi nu heini ziyà te ǥehinawa nu.
22 Su ebpekeveǥey heini te meupiya he kedlelawa wey meluǥayad he untung te edawat kayi.
23 Purungi nu pekeventayi is diyà te isip nu, su ke hengkey is ed-is-isipen nu, iyan daan egkeveelan nu.
24 Iselikwey nu is mezaat wey is mahawag he kegkaǥi.
