8 Is ituk, iring te metaam he keenen he egenahan ki he ed-eveleng duen.
9 Is etew he igkepeǥuli zin is terebahu zin, ne iring te etew he ebpendezaat.
10 Is Nengazen, iring te melig-en he turi he iyan egkeeputan te menge metazeng su wey zan kenà mekeizi.
11 Is ketiǥeyunan te menge sepian, midtuuwan dan he iyan kutè dan he iring te metikang he verengbeng he nekeliǥuy te inged.
12 Is kebpelavew te etew ebpekezezaat kandin, iyan, edeliǥen mulà is etew he kenà mepelevawen.
13 Taleng wey ebpeeled-eled is etew he tekew en edtavak te wazè din pemineǥa.
14 Is kelipey he egketaǥù diyà te ǥehinawa te etew, iyan ibpekesustinir zin emun egkezeruwan, iyan, emun seeng is egketaǥù diyà te ǥehinawa zin ne kenà sikandin ebpekesustinir.
15 Is etew he uluwanen wey zuen din kedsavut, egkesuat he meumani pa is netuenan din.
16 Melemu is kebpekidhinguma ta te dungganen he etew emun ed-uwit ki te ibeǥey ta kandin.
17 Emun diyà te husayen, is egkehuna he egkaǥi, henduen be te iyan en ebpekevenar, iyan, wey ebpekelepew is hustu emun ebpekedtevakè en haazà is dezuwa he edhusayen.
18 Is kedripa ebpeketavang te kesamuk, ebpeketavang daan te kedhusey te kasu te zezuwa he gemhanan he etew.
19 Is telesuled he ebpekedsilaǥà utew mereǥen he ibped-uliey te meupiya he gehinawa. Mereǥen pa heini he ebeelan kenà is kedseled te miberengbeng he inged. Iring ded kereǥen te kedrundus te trangka te ǥemawan te turuǥan, mereǥen he edhusayen is dezuwa he telesuled.
