eRoma 16:5-9

⁵Ya pakomostéényu agé hen anchichay cha omafurot way cha ma-am-among ah faréycha. Pakomostéényu agé hen anchi laylaychê way ah Epeneto way hiya hen anchi pés-éy ommafurot hen provinsiyan hen Asia.

⁶Ya etapeyu agé ah Maria way nangempapate way manorong hen afurotyu,

⁷ya umat agé cha Andronico an Junia way kacharaà way Judio way nìfarud an haén. Ya chicha, namangpangocha way ommafurot no haén, ya ririspituwén paat agé amin hen anchichay aposel chicha.

⁸Pakomostéényu agé hen anchi ifà way Ampliato way an-og laylaychén gapon Jesu Cristu.

⁹Ya umat agé ah Urbano way ihay ifani way chan sérfi agé an Jesu Cristu, ya anat agéh Estakis way ihay laylaychê agé.