10 Asa pu tataru nia sa poata si lopu qetu nia gua sapu gavoro va soku si asa; asa pu okoro hiva tagotago si lopu boka qetuni sapu ele tagoi sa. Hie tugo si loke laena.
11 Pana soku sari likakalae pu tagoi goi, si kote soku tugo sarini pu kote vagi pani. Ke sa sa laedi koa goi pu tagodi? Na pude doṉo lani mata meke beto mo?
12 Sa pinuta tanisa tie tavetavete si lomoso hola, lopu kiluna be hena va soku si asa ba vasinahite mo, ba sa tago va soku tanisa tie tagotago, si lopu boka puta va leana nia sa.
13 Dogoria rau si keke tiṉitoṉa kaleana hola pa kauruna sa rimata: Sa tinagotago sapu ta naqiti meke tinasuna nia sa,
14 meke sa tinagotago sapu ta ṉovala pa kaiqa tinasuna, meke totoso vagi tuna koreo sa, si loketoṉa boka veko hola ponia.
15 Dodohona sa koburu totoso vura si asa pa tiana sa tinana; mae gua asa si asa, ke mani pule gua tugo asa. Loketoṉa koasa nana minabo sapu ele vagia sa si kote boka paleke taloa nia sa pa limana.
16 Hie tugo si keke ginugua kaleana hola: Limalimana sa tie totoso mae, si gua tugo pana taloa si asa, ke sa mo si va gavoria sa? Na guana tavetavete ponia mo sa sa givusu.
