2 muriye da noko raghanina na gabudara, matu da kewokewo yeghanidi sinarusowa tami biiyadi, bi kiyara uuwadi dumadumadi gemeyani sinanaghotaveyanana,
3 raghanina bare koyakoyagha sinakiroro bi tomotomogha maragasidi sinaturayoudi, raghanina gudaguda siniraborabobo basuna toudi gepeyaridi, bi nokodi kitawiiverama sinakitakita na sinarusowa.
4 Tainam sinapotepoteyana da kwaritu kedae gekunawaiyanana. Tami kate gerubana da parawa kana gudaguda kwarituna konawaiyaneni, bi bada gerubana manu gamodi kenama sinakasikasi wiimatakim bi kunawaiyana.
5 Tami gawara kiidamo kirakiidi konanagharedi, bi kedae pepewa na sinikumakumararayina. Raghanina almond kiina yapopona; bi tatata tounamani yatayinakwaro mayeni - miimiikiidigha yatete yanagho, bi wiina tupadi na sinamomogha. Kiiravine wawaya na sanono yadi wiiyawiitaveyana gawarina makewaghawaghasine, wasina bi nama kedae na duudu inaghaaghari iiyawogha sirabobo na kiiravidiye.
6 Bi kwaro silvama siberana inatamoyaragha, bi kaboma gouldma beraberana inagawowori; bi kiyabu wusire makamakena inatamogawowora; bi kwaro doguve yarororoga na inatamoyaragha; bo wil doguve inatamorika.
7 Bi popoku sinaveramagha sinidobodobo mema sipiikana, bi yawa yawiina na inaveramagha God biidi, iiyabo iveredana.
8 Abawiiyeveveyana iwona da, “Sawara tupadi basudi gegha, parapa basudi gegha!”
9 Abawiiyeveveyana na geakakovina kawagha bi gegha da touna nonowa wawaya bada akowa kiiravine iyiiyevevedi. Touna wona kayowiiwiiyaka igirumeyana da yadi wiisuwona ikabirubatabatadi bi iriri yapoyaporidi.
10 Abawiiyeveveyana ivimatipo da sisiya waghata iyabanana bi iyagiruma da wiisuwona iyimaghatara yapori.
11 Wawaya nuwagiura kirakiina yana sisiya na ware kii gamgamna naboni meko sip bodaboda sakabi da sip situwiitetedina, bi yadi wonawiiyoyowana na ware kii ere tutuna gamgamna damone meko amama sarouwiimasiyeni yayowogha na naboni.
12 Iikatayim natugu, kuberawiimasi da wiiyeveveyana mududi gwabidima kumiiritaveyana. Buka girumidi na getana meme damodina, bi akowa kabikirakiiyenina na inabera da tubuyim inamameyeni.
