8 Ga wiripunydja nhanŋu ḻundu'mirriŋu dhärrana yukurrana yäku Wanduru, gutha'mirriŋu Djäyman-Betawu, ga ŋayi Wanduruyunydja ŋäkula ŋunhi nhaltjarra Djesuyu dhä-wirrka'yurruna ŋanya Bilipnha, bala ŋayi Wandurunydja marrtji, bala ḻakarama Djesuwuna bitjanna,
9 “Way, dhuwala waŋgany gurrmuḻ goŋ-ŋathamirri, ŋayi yukurra ŋayathamanydja dhuwala ḏämbumirri ŋathanydja ga märrma' guyanydja, yurru bäyŋu mak ganany'tja dhuwala bukmakkunydja yolŋu'-yulŋuwu.”
10 Bala ŋayi Djesuyunydja ḻakaraŋala bitjarrana, “Way, waŋiya walalanha yolŋu'-yulŋunhanydja, walala yurru nhina bukmak.” Yurru mulmumirri ŋunhiyi wäŋanydja nhinanharawunydja, bala walala marrtjina nhinanana bukmaknha, yurru yolŋu'-yulŋunydja ŋunhi mirithirri guḻku'na, 5,000-nha ḏarramuwurrunydja, ga biyapul dhäykawurru ga djamarrkuḻi'.
11 Ga ŋuliŋuruyinydja dhäŋuru ŋayi Djesuyunydja märrama ŋunhiyi ḻurrkun' ŋatha gurrmuḻwuŋu wekanhara, bala ŋayi buku-wekama Gunhu'nhana ŋurikiyi ŋathawu, bala yana wekaŋalana marrtjina nhanukalaŋuwala ḻundu'mirriŋuwalana walalaŋgala, bala walalanydja marrtji weka'-wikamana yolŋu'-yulŋuwuna bala. Ga bitjandhi liŋgu ŋayi guyawunydja, bala walala bukmakthuna ḻukanydja yukurra; bukmaknha yana gana' walala, maranhumirrina ŋuriŋiyi ŋathayunydja.
12 Dhawar'yundja walala ḻukanhaŋuru, bala ŋayi Djesuyu waŋana ŋanapurrunha, nhanŋu ḻundu'mirriŋunha walalanha bitjanna, “Gatjuy marrtjiya walala, wapmaraŋana ŋatha malanha ŋunhiyi bäythinyaranydja, märr yurru yakana ŋunhiyi ŋatha djäŋdhinyara ŋorranydja marrtji.”
13 Bala ŋanapurrunydja dhunupa galkaṉna marrtji ŋatha muṉguy ŋunhi, bala ŋanapurru ŋuriŋi ŋathayu bäythinyarawuyyunydja dhaŋaŋguŋalana bathinydja, 12nha ŋunhi bathinydja.
14 Ga ŋunhi walala yolŋu'-yulŋuyu nhäŋalanydja ŋunhiyi, ŋunhi nhaltjarra ŋayi Djesuyu djäma ganydjarryu dhika wal'ŋu, bala walala waŋanharamirrina walalawuynha walala bala-lili'yunmirri, “Way, yol dhuwala yolŋunydja? Dhuwalayina mak ŋayi yolŋunydja djuy'yunaranydja Gunhu'wuŋu, ŋunhi ŋilimurru ŋuli ŋänha ŋäthili ŋanya. Gul' ŋilimurru ŋanya yurru märramana, märr ŋayina yurru ŋilimurruŋgu buŋgawanydja ŋunhiyina.”
15 Yurru Djesunydja marŋgithirri warray walalaŋgu, ŋunhi walala yukurra djälthirrinydja buŋgawakunharawuna nhanŋu, bala ŋayi dhunupana winya'yurrunana gayulnha bukulilinydja wäŋalili, ŋayipina gänana.
16 Ga ŋanapurrunydja yukurra ŋunhili yana bäyma ḏäpthun, nhanŋu ḻundu'mirriŋunydja walala, yana liŋgu ga munha yupthun. Bala ŋanapurru dhunupa yarru'-yarrupthunna wäŋgama,
17 bala wapwapthun mitjiyalilina, bala marrtjina yana balayi roŋiyirri Gapaniyamlilina. Marrtjinydja ŋanapurru yukurra-a-a dhulmu-ḏakthunna-a-a, yurru ŋayinydja Djesunydja yaka ŋanapurruŋgala ŋunhili mitjiyaŋura; galkun ŋanapurru nhanŋu yukurra, ga bäyŋuna ŋayi buna ŋanapurruŋgu.
18 Bala ŋayinydja dharra ŋanapurruŋgu watana buna ŋunhili dhulmuŋuranydja, biyapulnha wal'ŋu ḏälnha, wirrkina yukurra bo'yun, ga gapu gaŋgathirrina wirrkina yana.
19 Yo, Marrtjinydja yukurra ŋanapurru ŋunhi bala-a-a, ḻiw'yunmirrinydja märr-weyin, bala ŋanapurru nhäma ŋanya Djesunhana, ŋayi nhina marrtji lili, yurru gapukurru ŋapakurru ŋayi nhina lili djartjaryundja. Marrtjinydja ŋayi ga-ga-a-a, galkithirrina marrtji mitjiyanydja ŋunhi, bala ŋanapurrunydja dharra barrarirri warray nhanbala, wirrki warray.
20 Bala ŋayinydja waŋa Djesuyunydja ŋanapurrunha bitjan warray, “Yaka nhuma barrariya. Dhuwalanydja ŋarra muka.”
21 Bala ŋanapurru goŋmirriyirrina nhanŋu, waŋa bitjanna, “Go Garray, wapthurrana lili, dhipala mitjiyalilina.” Wapthurrunanydja ŋayi ŋunhi ŋunhilinydja, bala dhunupana yana ŋanapurru dhawaṯthurrunana yulŋunydja, ŋunhimalayina wäŋalili ŋunhi ŋanapurru yukurrana marrtjina balayi.
22 Wiripu-guḻkuny'tja yolŋu'-yulŋu ŋunhilina bäymana yuku'-yukurrana, yana liŋgu ga djaḏaw'yurruna. Ga goḏarrny'tja walala ḏurryurruna, bala ḻarruŋalana nhanŋu Djesuwuna. Walala guyaŋina waŋgany mitjiya ŋunhi yawungunydja yukurranha djingaryuna dhiyala, ŋunhiyi liŋgu ŋunhi walala ḻundu'mirriŋu walala nhanŋu marrtjinyanydja, yurru walalanydja yawungu ŋunhi marrtjinya dhäpark warray, yaka warray ŋayi ŋunhiliyi yawungu walalaŋgalanydja mitjiyaŋuranydja; gonha'yunanydja walala yawungu ŋanya dhipalaŋga bäyma ŋunhi.
23 Ḻarruŋalanydja walala yukurrana nhanŋu Djesuwu, nhäŋala wiripuna mitjiya malanha, walala djarrawurr'yurruna ŋulaŋuru wäŋaŋuru Daypiriyaŋuruna yäkuŋuru, yana liŋgu ga dhawa-yawaṯ-gay ŋunhiliyina wäŋaŋura ŋunhi walala yawungu yukurranha ŋatha ḻukanha, ŋuliŋuruyi dhurrwaraŋuru ŋunhi ŋayi yawungu Garrayyu bukumirriyanha, buku-wurrpana manapana ŋurikiyi ŋathawu.
24 Ḻarrumanydja walala yukurra nhanŋu Djesuwu-u-u, ga yakana walala maḻŋ'maramanydja ŋanya, ga ŋula nhanŋu ḻundu'mirriŋunha walalanha. Bala walala wapwapthun mitjiyalilina malaŋulili, bala marrtji balayi Gapaniyamliliyi, märr ŋunhalayinydja walala yurru yukurra ḻarruma nhanŋu Djesuwu.
25 Yo, walala ŋunhi yolŋu'-yulŋuyunydja maḻŋ'maraŋalana ŋanya Djesunha ŋunhalana bala wiripuŋuŋurana gali'ŋura gapuŋura, bala walala dhä-wirrka'yurruna ŋanya bitjarrana, “Way Marŋgikunharamirri. Nhätha nhe dhuwala bunana dhiyalanydja? Nhäyu dhika?”
