14 Kotoeki laa la꞉ka꞉la koto pa꞉ta꞉ Yesu hayekeeki handeekepate kone Yesue hone na wiekeme.
15 Yesuma꞉ ipiki pa꞉ta꞉ alota꞉ Wanda꞉o. Ekipeke e̱ alepe. Epi weitolo alepe leekeme. Mo wanda꞉na꞉ hone wieke ekita꞉ mo e handeteke hayeke hali patema꞉ ipiki pa꞉ta꞉ alota꞉ Aneke halio. Nakana꞉ma꞉ ipiki mea pua wika꞉na꞉ta꞉ kota꞉ koto wili alena꞉ I̱ pa꞉ta꞉ la kie. Kutu pika꞉na꞉ta꞉ I̱ma꞉ mulu polueke leekeme.
16 Yesuma꞉ ipiki pa꞉ta꞉ alota꞉ Metio leekeme. Mo wanda꞉ma꞉ ipiki pa꞉ta꞉ la꞉ka꞉la mina hata꞉ Hibulu pi la alota꞉ Labonaie leekeme. Koto leeke ekita꞉ Wala꞉la꞉ Halio laa leekeme.
17 Yesuma꞉ ipiki pa꞉ta꞉ alota꞉ I̱ na mina꞉pe. Yaka Apa꞉ pa꞉ta꞉ a̱i̱ na la꞉ka꞉la a꞉meilo ekina꞉ loa꞉me. Yaka kametiti pa꞉ta꞉ yaka pi lawaalo pua꞉peke. Yaka Apa꞉ ika꞉ Apa꞉ make yaka Koda꞉ ika꞉ Koda꞉ make ipiki pa꞉ta꞉ paa la꞉ka꞉la a꞉meinolome lapeke leekeme.
18 Koto ekina꞉ Meti Ma꞉kadala wanda꞉ mo disaipolo haliweki pa꞉ta꞉ opolo pua Tekehali handeekeeki make Tekehalima꞉ ipiki pa꞉ta꞉ leeke pimanu make la haleekeme.
19 Koto Sande timbaata꞉ mo hande disaipolo ame̱le̱ pomu haemeke haliwekima꞉ mo Diu haliweki pa꞉ta꞉ paala꞉ma꞉ homolo hata꞉ da pota꞉manu poka loka꞉ hao da tukiki pa꞉ta꞉ momba꞉la pitimikipate Yesuma꞉ iki tukiki pa꞉ta꞉ a꞉pa hata꞉ alota꞉ Ika꞉ puki lopa꞉niaape leekeme.
20 Koto laata꞉ ipika꞉ kiki yaapo make ipika꞉ pa꞉ta꞉liki iki pa꞉ta꞉ waleekeme. Koto ekina꞉ mo disaipolo haliwekima꞉ Yesu handa꞉ta꞉ ta꞉na꞉ tieke homemekeme.
21 Kutupa Yesuma꞉ iki pa꞉ta꞉ paa alota꞉ Ika꞉ puki lopa꞉niao hape laa Hande Apa꞉ma꞉ I̱ epono tapaala꞉ tupa꞉ iki make pomina꞉ koto tupa꞉ tapaasome leekeme.
22 Kotoeki laata꞉ iki pa꞉ta꞉ pomo puaaso alota꞉ Mo hande Holi Sipitidi iki pa꞉ta꞉ kitoloma꞉ mipe leekeme.
23 Ikana꞉ma꞉ mandane wanda꞉halina꞉ hoke hau peleme ekimanu Koda꞉ma꞉ pa paeyaala꞉me lemeka꞉na꞉ta꞉ kota꞉ ota꞉ pa paeyaalieke. Kutupa make mandane wanda꞉halina꞉ hoke hau peleme ekimanu Koda꞉ma꞉ pa na paeyaala꞉me laa lemeka꞉na꞉ta꞉ kota꞉ na paeyaake paa wilieke la leekeme.
24 Mo Yesu epeeke natena꞉ hande disaipolo hali homeke iki ame̱le̱ na pitiekeme. Ipikita꞉ Tomasi kone ipika꞉ biki ma꞉nda꞉ Manda꞉e.
25 Koto ekina꞉ mo hande disaipolo haliwekima꞉ ipiki pa꞉ta꞉ alota꞉ Nikana꞉ma꞉ mo Tekehali handoma꞉me lemekepate ipikana꞉ma꞉ alota꞉ I̱ma꞉ make ipika꞉ kikina꞉ ikokoma꞉ aweekeeki handaa yaka kiki ma̱leke puaota꞉ kutupa ipika꞉ pa꞉ta꞉likina꞉ aweekeeki pa꞉ta꞉ make yaka kiki puaota꞉ ota꞉e lolo polopate I̱ma꞉ na handeke hata꞉ta꞉ ika꞉ aleme pita꞉ na opulueke leekeme.
26 Kutupa pula homeke paeyeketa꞉ hande disaipolo haliweki Tomasi ame̱le̱ mo da tukiki pa꞉ta꞉ pa momba꞉la haemekeme. Mo pota꞉manu loka꞉ hao haemekepate Yesu a꞉paata꞉ iki tukiki pa꞉ta꞉ a꞉pa hata꞉ alota꞉ Ika꞉ puki lopao pita꞉pe laata꞉
27 Mo Tomasi pa꞉ta꞉ alota꞉ Naka꞉ kiki ma̱lekema꞉ yaka kiki yaapo pa꞉ta꞉ a꞉pa puae. Kutupa naka꞉ kikima꞉ ya pa꞉ta꞉liki pa꞉ta꞉ make a꞉pa puae. Koto ekina꞉ naka꞉ pi na opitele hau paa na piki ota꞉ opua꞉peke leekeme.
28 Tomasima꞉ alota꞉ Neketa꞉ yaka Tekehali make yaka Koda꞉ make haleme leekeme.
