16 Landè ulu di tah tanà ani fulung mebe i dad to di fye, ku ise agu tmabeng dale.
17 Kandogu i dad kamdo deg, na dad to mngabal deg, teenla agu.
18 Banlégu ale knun mlawil, afè, na kafye knè.
19 I gwèyu mdà di deg, mabtas fa di kabtas i too blawen, na di kabtas i too salafì.
20 Magu agu di dalan matlu, na lalògu i matlu nimò.
21 Na i dad kamdo deg, banlégu ale knun, na tananùgu i mabtas knun i gumnèla.
22 Agu kfulung, muna mgimò Dwata, di laan fa mgimò i kdee di tah tanà ani.
23 Tagnè agu mdà fa di kagatbuan, di là fa mgimò i banwe ani.
24 Tagnè agu di landè fa mahin, na dad sfuten i fnò yéél.
25 Di là fa mgimò dad bulul, tagnè agu.
26 Na di là fa mgimò Dwata i klamang banwe, na balù i kfung, tagnè agu déén.
27 Déén agu di kafkah Dwata i langit ditù di tah, di kimoan i bleng i langit na mahin,
28 di kafkah Dwata i dad labun di langit, di dad sfuten di lam i mahin,
29 di kafkahan ilè di gusen i mahin, du fye là sambél di kafkahan dun, na di kimoan kgal i klamang banwe ani, déén agu.
30 Déén agu di safédan, na magin agu kenen mimò. Na kat i duh flehew agu kenen, na lehew agu magin di kenen,
31 na lehew agu i banwen, na i dad to tamgimoan.
32 Taman dad ngàgu, fanlingeyu agu, nun klehewyu ku nimòyu i gmangu di gamu.
33 Ku fanlingeyu i tdògu gamu, nun kfulungyu, na tooyu fkah di nawayu i gmangu ani.
