6 Kabay fakay finumam tukay di dad to tafan mati, demen i dad to too msamuk i nawala di klidùla,
7 du fye glifetla i klandèla na i klidùla.
8 Nsenam i dad to landè kibò msen i ktola, na tnabengam i dad to landè kibò tmabeng i ktola.
9 Nsenam i dad to landè na tanlum i kukumam dale na tnabengam i dad to landè na i dad to too nun klidù.” Ani gman i yê Harì Lémwél di kenen.
10 Malima mite libun nun yaan too fye ldam, na bay ku nun teenam, mabtas fa kenen di too mabtas kas.
11 I yaanan too smalig di kenen, na landè gukulangan.
12 Klo i libun ani mnè di tah tanà, too fye kiboan yaanan, na landè sasè nimoan di kenen.
13 Too malgad kenen mimò klaweh mdà di bul bilibili.
14 Gal matun kakaanan di gumawag banwe, na neben di gumnean, salngad nimò i kafal gal mebe kakaan mdà di gumawag banwe.
15 Di là fa mwal mték kenen du nimoan knaan i malayan, na dekan dad saligan libun mimò dademe nimò.
16 Salu kenen di satu tanà du neyen, na bnayadan, na fagu di filak gwean mdà di nimoan, bayadan bnê du fanlan i tanàén.
17 Too mayè kenen mimò na too malgad, na nun kgalan di dad nimoan.
18 Gadean i kabtas kdee nimoan, na balù kifu mimò kenen.
19 Mimò kenen sinulib na mabal klawehla.
20 Too kenen mayè mlé di dad to landè na di dad to nun klidù.
21 Kel i bang katno, landè klikoan, du tanun klawehla fatlagadan.
22 Nimoan dad kayabla, na too fye bung klawehan na too fye baweh i batakan.
23 I yaanan too mdengeg, du kenen satu ulu di banwela.
24 I fye libun ani, gal mimò i klaweh na fablin, na mimò dad galing, du fablin di dad to gal fabli.
25 Too kenen mgal, na too mgafè, na landè klikoan balù tan kel di dale.
26 Ku talù kenen dileam i kfulungan, na too glut i katdoan.
27 Too kenen mimò, na toon nifat malayan di dad klidùla.
28 Too mabtas kenen di dad ngaan, na dnayen kenen i yaanan.
29 Man i yaanan, manan, “Nun dee dad libunfye, bay ge too mdatah di kdee.”
30 I fye kalyak i libun slaan là glut, na i kafye bawehan mlallana, bay i libun too nun klikò di Dwata too magdayen.
31 Fye ku blé di fye libun ani, i untung di kdee nimoan, na mdà di fye nimoan, dnayen kenen kdee dad to.
