1 I to sasè, gal mila du nun klikoan, balù landè tmafik kenen, bay i to matlu là likò, gambet i lmanaf liyun landè klikoan.
2 Ku sasè nimò i dad to di satu banwe, gal matlas i ulula, du làale gmagan mebe, bay i ulu nun gnadè na nun kaglabatan, kenen sa gmagan mebe i satubanwe di gufye.
3 I to nun glal mkut i dad to landè, kenen gambet i too bong ulen falmo i dad fule.
4 I dad to là kmabas i dad flalò, msen ale di dad to sasè, bay ku mimen ale i dad flalò, dmuen ale i dad to sasè.
5 I dad to sasè, là ale gamlabat i katlu nimò di dademe to, bay i dad to mayè gmadè knayè Dwata too ale gamlabat.
6 Fye fa i to landè ku matlu i nimoan, di to nun knun bay mlimbung i demen to.
7 I tingà mimen i dad flalò nun kaglabatan, bay i tingà magin i dad to mimò sasè fyaan i maan.
8 I to mbaling nun knunan fagu di bong kafngaan i filak fdeman, i knunan ani baling gablé di to mayè mlé di dad to landè.
