7 du fye fa ku manan di ge, “Dini ge di too fyegusudeng,” di kafyaan ge fagu di kmanan, “Blém igusudengam di mdatah to ani.”
8 Nang ge flal tmulen di gususay, balù nun teenam, du ken là glut, du ken nun dademe to tmulen na là salngad i ktulenyu, du ku là salngad, landè kiboam ku fyàla ge.
9 Ku nun demem to na nun là gusalngad i nawayu, stulen gamu alògamu lwe, na nangam tulen di dademe to i dad santulenyu i là fakay tulen didale,
10 du ku gmadè i dademe to, talandè ksaligla ge, na baling ge myà, na sasè dengegam kel di atuan, du tmulen ge i là fakay moon gadè idademe to.
11 Too fye fanlinge i talù too mastadè, salngad kafye i kafye falas di gumnè i harì.
12 I fngewe i to fulung faldam di to too fulung flinge, too mabtas fa di kas mgimò mdà di too glut blawen.
13 I to dek tmulen too gsalig, gafye nawa i to mdek kenen, salngad kafye nawa i to nun too tno yéél di kinit i duh di bangkaktu.
14 I to makang nun blén, bay laan gafles blé dun salngad too mlabun na too mnus, bay là gafles mulen.
15 I to fganag i taluan na ftahaan i nawan, gamguman nawa dad gumdatah i mgal ulu.
16 Ku minum ge tnab, nang flukas, du ken utaam.
17 Nang ge alì tlang di gumnè i demem to, du ken glukas na knangan ge.
