14 I to makang nun blén, bay laan gafles blé dun salngad too mlabun na too mnus, bay là gafles mulen.
15 I to fganag i taluan na ftahaan i nawan, gamguman nawa dad gumdatah i mgal ulu.
16 Ku minum ge tnab, nang flukas, du ken utaam.
17 Nang ge alì tlang di gumnè i demem to, du ken glukas na knangan ge.
18 I to tmulen kéng gablà di demen to di gususay gamfati salngad i bunal, sundang, na i sait gamban du gamfati.
19 Én ksasè i to smalig di to là gsalig di bang nun ksamuk, salngad ksasè i kifan maglifò na i satu blì là gmagan du slamelandè gukmamu.
20 I to flehew mlingag di bang nun klidù nawa i demen to, salngad ku maglus i klaweh di bang katno demen ku nkah kahì i seey, du slame là fakay du mgutes i ksasean.
21 Ku bitil i to dmuen gamu fankaanyu kenen, ku malinum banléyu kenen ninum,
22 du ku ani nimoam, mbaling kenen too myà mdà di kafsasean gamu, na gdawatyu untung mdà di Dwata.
23 Ku bang i balat too gafles mulen salngad kagafles i kalbut ku nun malsalék.
24 Fye fa ku i lagi nun yaan mnè di too tukay lawig di satnù di gumnè i yaanan mayè mugak.
25 I fye tulen mdà di gumawag banwe too fye di nawam salngad i kafye nawa i to malinum di kinuman i yéél tno.
26 Too makakdo i to matlu ku naginan i to sasè, salngad i to gal magu ku kel di sfuten na di gal gusmulu na slamemalbal.
