3 Fagu di kfulung i satu to gafdakan i gumnè, na fagu di kaglabatan nun kgal i gumnean,
4 na du nun gnadean, nun mabtas na nun fye baweh kandeenan di dad sibayan.
5 Fye fa i to fulung faldam di to too mgal, du too mdatah fa i gnagan i to nun gnadè di to nun kgal,
6 du ku fan ge salu di gusfati, mni ge funa i fye fngewe, na fagu di fye kafngewe i dee mebe, na matu ge sa di kasfati.
7 I mngalam talù i to fulung faldam là glabat i to là fulungfaldam, taman ku nun kastulen too mngalam, landè timelan du laan glabat.
8 I to funan fandam i kiboan mimò sasè, én kdagit kenen i to mimò samuk.
9 I ksamuk i gal fandam i to là fulung faldam, salà sa, na knang dad to i to gal madoy.
10 Ku mlungay i nawam di nun samuk, too glut mlungay ge.
11 Faflalam falwà i to landè gugsalaan, i fan fnati i dademe.
12 Kabay ku balingam man, “Landè gadègu, nalandè labetgu di to atù,” bay gmadè Dwata ku tan i mnè di nawam, du kenen too meye ge, taman gadean i kdee, taman bnalasan ge di kdee dad nimoam.
