2 I kaflabè i harì gamlikò, salngad i bong ngal i lmanaf liyun, na ku faflabeam kenen, salngad ku tafafatim i ktom.
3 I to là makuf di ksugak, mgafè kenen, bay i to too mayè sugak, kenen i to là fulung faldam.
4 I to malwe mimò, i là mayè dmaru di bang kdaru, landè gwean di bang i kaktu.
5 I dad fandam i satu to too mngalam, gambet i too mngalam yéél, bay i to nun kaglabat, glabatan dad fandam i to mngalam fandamani, na kenen gmagan fafalwà dun.
6 Dee dad to dagla i ktola, ale kun too kamdo na too gsalig, bay i kaglutan, too malima mite i to too glut gsalig.
7 I to matlu nun katlu i nimoan, na nun kafye gdawat i dad ngaan.
8 Di ksudeng i harì di gumukuman, dilean sa i ksasè nukuman.
9 Simto to fakayan man too mlaneb i fandaman na landè salaan?
10 Knang Dwata i dad to tmimbang di timbang mlimbung, na masad di mlimbung gumasad.
11 Balù i tingà dileam ku tan i ldaman fagu di dad mgimoan, ku gal mimò fye na matlu.
12 Dwata mlé gito klinge, du fye flingeito, na mata, du fye neyeito.
13 Ku tatì ge fadlug kudang mbaling ge to landè, taman too ge falgad, fye nun lukas knaanam.
14 I dad to mayad gal mugak gablà di kabtas i dad fabli, bay di kulêla dagla, du mdanà i kagwèla dun.
15 Blawen na dad mabtas batu too mabtas, bay mdatah fa kabtas i gman i dad to nun gnadè.
16 Ku nun to makang kenen mayad uteng i to laan gadè, fye ku nleges kenen smandà i knunan, kel di kagbayadan i utengan.
