12 Dwata mlé gito klinge, du fye flingeito, na mata, du fye neyeito.
13 Ku tatì ge fadlug kudang mbaling ge to landè, taman too ge falgad, fye nun lukas knaanam.
14 I dad to mayad gal mugak gablà di kabtas i dad fabli, bay di kulêla dagla, du mdanà i kagwèla dun.
15 Blawen na dad mabtas batu too mabtas, bay mdatah fa kabtas i gman i dad to nun gnadè.
16 Ku nun to makang kenen mayad uteng i to laan gadè, fye ku nleges kenen smandà i knunan, kel di kagbayadan i utengan.
17 I to gamwè fagu di klimbung too lehew, salngad i klehew dikagneman i too fye knaan, bay i gukelan sasè, salngad ksasè i baan too fnò falak.
18 Ku nun fandamam i fanam nimò, mni ge funa i fye fngewe, na ku fan ge salu di gusfati, mni ge funa i fye fngewe.
19 I to samtugad salék là gsalig, du fgadean i dad buni, taman fawag ge di to too mayè samtugad salék.
20 I to fanlagin i maan demen i yéan, fnati salngad i salò fnati di kifu.
21 I knun tatì gtagak di ge na gwè fagu di sasè kfagu, landè fye gweam déén kel di atuan.
22 Nang ge makang malas i sasè mgimò di ge, bay baling ge smalig di Dwata, du kenen falwà ge.
23 Knang Dwata na laan kanlehew i dad to tmimbang di timbang mlimbung.
24 Dwata tagnè gmadè i gumagu i satu to, bay landè kibò i satu to gmadè i gumagun.
25 Sasè ku laam too funa fandam di là ge fa makang ku nun blémdi Dwata, du ken laam dnohò dun.
26 I harì fulung faldam dmilè ku simto i dad to mimò sasè, na fanlayaman ale di landè kakdo.
27 Tabanlé ito Dwata i fandam na kgadè i fye, taman landè gbuni di kenen.
28 I harì too mlawil i glalan ku neben i kagotan digumatlu, na ku kandon i kdee na landè fnalabin.
29 I dad lamnok to, too dag i dad to i kgalla, bay i dad tua to, too nafè i dad to.
30 I kaflayam fakay gamlaneb nawa i sasè to, du fagu di kaflayaman, numanan i nawan.
