4 I to nun knun, too dee demen sgalak, bay i to landè, tatì tnagak i demen sgalak.
5 Ku là glut i ktulen i to tmulen di gususay, fanlayam kenen, na là galwà i to tmulen kéng.
6 I kdee to too mngabal i kfagu gaflehew nawa i mdatah to, na kdee to mayè samgalak i to gal mlé.
7 Balù dad flanek i to landè là fduf kenen, labi fa kfawag i dad demen sgalak di kenen. Na balù toon fangal fakdo di dale, là ale fdadong di kenen.
8 I satu to ku fulung faldam magtabengan i kton, na ku toon fkah di nawan i kaglabatan nun gufyen.
9 Ku là glut i ktulen i to tmulen di gususay, fanlayam kenen, na malmo i to tmulen kéng.
10 I kafye knè là blà i to là fulung faldam, na i to salig, là gablà ku kenen mdek i amun.
11 I to fulung faldam gadnanan i klabean, na ku nun gamsalà di kenen, ku tatian fbayà, na dnayen kenen i dadto.
12 I kaflabè i harì gaflikò salngad i bong ngal i lmanaf liyun, bay i kakdon too fye salngad i ulen tatì sanfatan.
13 I tingà là fulung faldam, gafalmo i maan, na i libun too mugak i yaanan too sasè fanlinge, salngad uni yééllà tlag tamdak.
14 I to gamfun i gumnè na filak mdà di dad tuan, bay alò Dwata i gmagan mlé kenen i yaan fulung mebe i kton.
