1 Kau rongovia aeni ighau udolu na lei vure; Ighau udolu tana maramana kau varongohighi.
2 Haba mana kubolu, tinoni sosodo mana bona, kau rongo!
3 Na lei bosagu te vonughia na manaha; mana lei ghanaghanagu te nia vonu na ghilala.
4 Inau tu varongohi pukupukua na lei vavaghaha mu ku tatea nigua na bosa tana ghalevu ghalo.
5 E Taho na hava ku mataghunia tana bona ni gunagunagha. Tana bona na levunimate tara talighutiu.
6 Gaira tara ghanaghana kodo tadia na lologho au. Mara nighi mangamangagha didira na sosodo au.
7 Me taho siki sakai tadira ke huiolia heghena tana mate mana peluana nina peluoli God
8 Na huioli te mua malumu na maiana Me taho siki sakai ge ke pelu aua.
9 Me ke vagha ge ke vola kasila me ke mua righia na maramana ni mate.
10 Mara hei tara manaha kara mate, te vaghara na bule mana toba kupi. Ara luba sanighi didira na sosodo au i muri.
11 Na puku ni komudira na maramana ni mate, gaira kara kabu igaa ke va me va; Mara holo taonira nia na bona keri, mara sanighi didira na lologho vanira na keha.
12 Ma gaira kara mua kabu daro ta didira na lologho au; Gaira kara mate vaghara vamua na lei maumanu.
13 Aeni te vagha didira na hahi tara bule mara talu sulera heghedira.
