1 Na vunaghi haba te togo na pukuna to vahea na laga, Ghe Lord! Gaia te nia ghu na rivurivu na pukuna nimua na lagavule.
2 Ighoe to vahea na hava te liona tana tobana; ighoe to mua tabe olia na hava te nongia.
3 Ighoe to vautoa nia na lologho sule. Ighoe to talua na pitiulu ni gold tana uluna.
4 Gaia te nongigho ge ko righitaonia na volana tana totobo te dika, mi ghoe to vahea na hava te nongia ge ke daro na bongi ni volana.
5 Nimua na lagavule te talu datoa tana malei haba, mo pupulua nia na lologho sule mana rongoragha.
6 Ighoe to vautoa nia nimua na lologho kasila mo vonughia nia na rivurivu ta nimua na tabu.
7 Na vunaghi haba te varava a itatana Lord, puku ni maana; Nina dolo na Puku ni Haba te mua tughu ke righitaonia ge ke bei saisarikiba.
8 Ighoe ko lotira na ghamua na kana, na lima madolomu te laga ke mina lotira rahei tara nigho sika.
9 Ighoe ko taghalaghinira vaghaa na lake te vuvusi tana bona ko tughuru tate. A Lord ke taghalaghinira ta nina rutu, mana lake ke ghoi taghalaghinira.
10 Ighoe ko taghalaghinira na lei daledira tana maramana; ma kara mua ghoi loghoa na vaivaridira.
11 Sakai vamua kara kobe pungisigho, didira na gehegehe kara mua nia tangomana.
12 Gaira kara ririu ma kara sama tana bona kara righia nimua na kuali ke tuhura va.
