8 Ol brata bilong mi ol i lukim mi i olsem man bilong narapela lain. Na ol famili bilong mi ol i lukim mi i olsem man bilong longwe ples.
9 Mi laikim tru haus bilong yu, olsem na mi wok strong long mekim dispela haus i stap gut. Ol man i tok nogut long yu, na dispela tok i kalap long mi.
10 Mi save tambu long kaikai na long dispela pasin mi daunim mi yet long ai bilong yu. Tasol ol manmeri i tok nogut long mi.
11 Mi pasim klos bilong sori, tasol ol man i tok nogut na tok bilas long mi.
12 Ol man i bung long rot na ol i toktok long mi. Na ol man i spak long wain samting ol i kirapim sampela song nogut long mi.
13 Tasol maski, mi bai beten long yu, Bikpela. God, long wanpela taim yu yet yu makim, yu ken bekim prea bilong mi. Yu bai mekim olsem, long wanem, yu save laikim mi tumas na yu promis pinis long kisim bek mi. Na yu no save giaman. Nogat tru.
14 Yu mas kisim bek mi long dispela tais bai mi no inap i go insait na lus long en. Yu lukautim mi bai ol birua i no inap bagarapim mi, na dispela wara i daun tumas em i no inap karamapim mi.
15 Yu no ken larim dispela tait i kisim mi. Na yu no ken larim mi i lus long wara i daun tru, bai matmat i daunim mi.
16 Bikpela, oltaim yu save laikim mi tru na dispela i gutpela tumas, olsem na yu ken bekim prea bilong mi. Yu save marimari moa yet long mi, olsem na nau yu ken i kam helpim mi.
17 Mi wokman bilong yu, olsem na yu no ken hait long mi. Mi gat bikpela hevi, olsem na yu mas hariap na bekim beten bilong mi.
18 Yu kam klostu long mi na kisim bek mi. Kisim bek mi long han bilong ol birua bilong mi.
19 Yu save pinis long ol man i save tok nogut long mi. Na yu save long ol i mekim mi i sem na daunim nem bilong mi.
20 Dispela tok nogut i bagarapim tingting bilong mi, na mekim mi i bel hevi moa yet. Na mi no gat strong moa. Mi bin ting bai sampela man i sori long mi, tasol i no gat wanpela. Na mi ting bai sampela man i givim mi gutpela tok bilong strongim bel bilong mi, tasol i no gat.
21 Taim mi hangre ol i givim marasin nogut long mi. Nek bilong mi i drai na ol i givim mi wain nogut tasol bilong dring.
22 Orait taim ol i bung long bikpela kaikai, mi laik bai dispela taim bilong amamas i ken kamap samting bilong bagarapim ol, olsem umben i holim abus na olsem hul ol i ken pundaun long en.
23 Mekim ai bilong ol i tudak, bai ol i no inap lukluk moa. Bagarapim baksait bilong ol, bai ol i no inap sanap strong.
24 Yu ken kros moa long ol na mekim save long ol. Na belhat bilong yu i ken kisim ol, na bai ol i lus.
