Bugagia Bidibo Kolesagade Po Asęai Buku 19:10-23 in Dadibi

¹⁰ Te wiegi yai homu elalusiąbo bidi bidibo, te tiali goli agai te mone hauwa elalubaso da, teda te dolo ebeo. Tiali goli, te olo sę ebo bidi te tobolu bidi pedelama, tama te genuai nogi elalubo bidi dabe tonalubaso da, teda te dwai mu ebao.

¹¹ Te wiegi yai homu elalubo bidi, te agai wado po polo me wagobeo. Te agai polasa ebo kolesaga te tama tiwai. Te gasa bidigo agabolo dwai sę ebo te agai homu kone me palogobeo.

¹² Te kingo wado weyu, te haliga sębę eyu ebo, aga te laiongo bomonama te gaa wabo tiwai ebao. Tiali goli, agai te bugai haliga elama, tama te we bidi dabe tau sabo homu eyu da, te segeni tulubage tuluyu, te nai bugagia holomainu ebo tiwai te ebao.

¹³ Te ogwago wiegi yai homu elalusiąyu da, teda agai te genuai sęgę mu te aga ayabolo mobao. Te bidi me deligo wego, te wego te wado po me te po hauwa wedu gebo we yai baso da, teda te be pedudu te be tomoba tulubage tuluyu, tama sesemane sogo te dwasianu dwasianu tetebo tulubo tiwai ebao.

¹⁴ Te aya idago te be, me mone, te doado bage dabolo mawaibao. Tiali goli, God deligo agai te dabolo wiegi yai homu kolesaga elalubo we da mawaibao.

¹⁵ Te hagela bidi dabe te sesemane godege pila mudaibao. Te olo naga bidibo bidi da, teda te nai meniama, te nai sili bidaibao.

¹⁶ Te bidi te Godigo bomai po wali pabo bidi da, teda aga bugagia bidiyu, te me dologobeo. Me ma, te Godigo kolesaga dabe te tudiba mubo bidi da, te aga isaibao.

¹⁷ Te magi nai doado bage meni yai bidiba nago te olo tau sabo wiegi yai kolesaga eyu, tama te doado bage mobaso da, te Genuai Bidigo negeli nageba ilibo tiwai ebao, tama nosali Genuai Bidigo nageba wei ponaibao.

¹⁸ Te naga ogwago hagoma ebaso da, nago aga dodolao, tama agai wiegi yai kolesaga wali paibao. Tiali goli, te nago agai te dwai kolesaga wali pomainu sula tagalu gogolobaso da, te nago aga isimainu usu da wabo tiwai ebao.

¹⁹ Te wado po polo weyu ebo bidi da, teda aga dwai sę yali sęgę te aga tolomainao. Te nago aga tau selama, tama te sęgę silibo si da, teda nosali te nago aga ma tau somainu homu yaibao.

²⁰ Te bidigo nage ola momainu eyu, tama nago te wiegi yai homu kolesaga momainogo eyu da, teda nosali nago te wiegi yai homu koneani kolesaga me elaluaibao.

²¹ Da we bidi dabe dago te sę hauwa yabo homu ebo dao. Tiali digi, te Genuai Bidigo yabo homu yali sę te naga te pedelaibao.

²² Te bidi dabego te homugo mu kęą pai bidi te wei mu ebo dao. Awe, te bidi doado bage meni yai bidibaso, te wiegi yai me egobeo. Tiali goli, te magi nai doado bage meni yai bidi da, agai te tibo po wabo bidi aiyaba mu elalualio.

²³ Te nage Genuai Bidide wi eyu, aga dologode bidibaso da, te kolesagago te nage bidibo ula mobao. Tama nage sesemane bugagia bidiyu, tama dwai nai nageba me pedalugobeo.