7 Et siya dana di inpadton Balaam: “Inmayag din ari ed Moab ay si Balak. Din kadondontogan ed Syria sin naibanda si belaan di agew di napoak. Kanana, ‘Omali ka ta baosam din Israelita.’
8 Ngem kanak abe en sisya: Ay mabalin aya ay baosak din adi binaosan Diyos ay namarsua ono mankaliak si lawa ay maikontra en daida yan si Diyos pay et maga di inkeddeng na ay dosa da?
9 Mo wadaak sin kadondontogan, tamtamangek daida, manipod sin kabatbatoan et os-osdongak daida. Daida di nasyon ay omalagey si bokbokod da, tan naitken da, waday nanlasinan da.
10 Din Israelita et kaman tapok di kaiarigan da, tan adi kabilang di kaad-ado da. Mo mateyak yan sapay koma ta kaman met laeng din kateyan da ay nalinteg di kabibiyag da.”
11 Pag et kanan Balak en Balaam, “Apay ngin sas inamag mo? Inayagak sik-a ta say baosam din kaibaw ko, ngem din inamag mo et binindisyonam daida.”
12 Sinombat si Balaam yan kanana, “Din inbagan anggoy Diyos en sak-en di mabalin ay ibagak.”
