1 Gↄ̃gbɛ̃ kee kú Uzu bùsun yã à tↄ́n Ayuba. Gbɛ̃ maaamɛ, ègↄ̃ taari vĩro. À Luda vĩa vĩ bensↄ̃ à gì yãzaakɛnazi.
2 À nɛ́gↄ̃gbɛ̃nↄ vĩ gↄ̃ↄn swɛɛplaa, nɛ́nↄgbɛ̃nↄ gↄ̃ↄn aagↄ̃.
3 À sãanↄ vĩ bↄrↄ swɛɛplaa, lakuminↄ bↄrↄ aagↄ̃, zùnↄ bↄrↄ do, zaakinↄ wàa plaa kpɛ́ basↄↄro, bensↄ̃ à zĩkɛrinↄↄ pari maamaa. À auziki bíta dɛ ↄfãntɛ̃bↄɛ kpa gbɛ̃nↄ pↄ́la píngi.
4 À nɛ́gↄ̃gbɛ̃nↄ ègↄ̃ pↄnna pↄ́blee kɛɛkↄ̃nɛ bɛ kↄ̃n bɛɛo, aↄ̃è ń dãre pìnↄ sísi aↄ̃ mↄ́ wà pↄ́ ble wà í mińyo lɛdo.
5 Gurↄↄ kɛ̀ aↄ̃ pↄnna pↄ́ blè wà yã̀a píngi, Ayuba è gbɛ̃ zĩḿma wà gbãsĩ bↄńgu. Tó à guu dↄ̀, è fɛɛ kↄngↄ idɛ'idɛ à sa'opↄ kɛ̀ wè ká tɛ́n à tɛ́ kũ o aↄ̃ baadenɛ à be: Wègↄ̃ dↄ̃ro ma nɛ́nↄ durun kɛ̀ aↄ̃ dↄkɛ̀ kↄ̃n Ludao ń swɛ̃̀n gwɛɛ. Lɛn Ayuba ègↄ̃ kɛɛ lɛ gurↄ píngi.
6 Zĩkea malaikanↄ mↄ̀ wà zɛ̀ Dii aɛ, bensↄ̃ Setãn kú ń tɛ́.
7 Ben Dii bè Setãnnɛ: N bↄ mámɛ? À wèàla à bè: Mɛ́ɛ gaa mɛ́ɛ suu mɛ́ɛ likↄ̃aa zↄ̃ↄ anduna guumɛ.
8 Ben Dii bènɛ: N ma zↄ̀bleri Ayuba èↄ́? À sáa kú anduna guuro. Gbɛ̃ maaamɛ, à taari vĩro. À ma vĩa vĩ bensↄ̃ à gì yãzaakɛnazi.
