29 Nxe³ha²kxai³ Pe²jah³lai²li² ãh¹ ĩ³ye³te³nah¹lxi¹: — Txa²wã³tã̱³nãu³xãi³. Txa²wã¹hxi²kan¹jah¹lu¹tai²na² Ta³vi²yah³lu¹tai²na² wain³txi³ ĩ³yau¹ũ³nx2ta¹tu¹we¹. Nxe³jah¹lu¹tai²na² ya³lu²ha²kxai³ sa²nĩ̱³kxain¹ta¹hxai²ti³ai¹ti²tu³we¹. A²kwã̱³kxa³yu³tai²li² yũ³te²jai¹ti²tu³we¹.
30 A²nxe³jah¹lai²li² Txa²wã¹sũ̱³na² wãn³txa² ĩ³hen³txi³jah¹lo²su² te²la³kxe³su² ta¹hxai²ti³ai¹ti²tu³we¹. Nxe³ha²kxai³ Txa²wã¹sũ̱³na² hi²sen³kxai³lu² ĩ³ye³kxi²te³nah¹lxi¹: “Ta³vi²yah³lãi³. Wxãi²na² I³sa³e² nũ̱³ka̱³txa² a²hxi²kan¹ta² si³yxau³jah¹lo²si¹lxi¹. Nxe³sxã³ ã³yã³wẽ̱³not3si¹nxa²jau³su² wxa²ne³tah²nãu³su² ũh³wxe³na¹tu¹wi¹. A²nxe³jah¹lai²li² Kris²tu³jah¹lo²sin¹tu¹wi¹. Nxe³ye¹nxa²ha¹wi¹.” Ta¹hxai²hẽ¹le¹. Nxe³jau³xai²li² Ta³vi²yah³lu¹ta²kxai³ a³la³kxi²ta¹hxai²ti³ai¹ti²tu³we¹.
31 Nxe³ha²kxai³ ju¹tai²na² a³la³kxi²ha²kxai³ Kris²tu³jah¹lai¹tã² Txa²wã¹sũ̱³na² A²hxi²kan¹ta² Si³yxau³tãu³lo³jah¹lai¹tã² ka³te̱n³su² ĩ³sa²yxau³xi²ju³ta³nũ³a² nxe²e³kxi²nũn³te³nah¹lxi¹: “Kris²tu³jah¹lai²li² ya³lu²kxan²ti³ kxãn¹su² tĩ¹xa³lho³li¹. A²nũ²ai²na² ka³lu²sxã³ tĩ¹xa³lho³li¹.” Ta³vi²yah³lu¹ta²kxai³ nxe³ta¹hxai²hẽ¹le¹.
32 Jã¹nxe³ju³kxai³lu¹ ya²la³tu̱³ Txa²wã¹sũ̱³na² hi²sen³kxai³lu² Je³su²jah³lai¹tã² sa²kxai³lu² ka³te̱n³su² ĩ³sa²yxau³xi²na²hẽ³le¹. Nxe³ju³tai²na² ĩ²sĩ¹na¹hẽ³le¹.
33 Nxe³ha²kxai³ ka³te̱n³su² ĩ³sa²yxau³xi²ka³tu̱³ Txa²wã¹sũ̱³na² yxau³ju³ta² ka³la³xi²nũ²la² a²wi¹tãu³a² ã³wxe³na²hẽ³le¹, Jah¹la² Hxi²kan¹ta² Si³yxau³jah¹lo²su² ha²kxai³lu¹. Nxe³ka³tu̱³ Txa²wã¹sũ̱³na² Yãu³ka³txa² ĩ³ye³kxi²nẽ³jah¹la² a³ka³nxe³na²hẽ³le¹. A²nxe³ju³tai²li² a²kxã³nhxĩ¹nu¹tai²na² Txa²wã¹sũ̱³na² hi²sen³kxai³lu² nxe² ĩ³yau¹ũ³ũ¹nhẽ³ta¹hxai²hẽ¹le¹. Nxe³ju³ju¹tai²na² ã³ne³wxe³ki̱³tã³le¹.
34 Nxe³ha²kxai³lu¹ Je³su²jah³la² yã¹nxe³kxe³hũ̱³nxe² Ta³vi²yah³lu¹tai²na² sa²kxai³lu² oh³xan¹ko³nãu³a² hai³txi³ ĩ³ka³la³sĩ²ta¹hxai²nxa³hẽ³le¹. Hãi¹nxe³sxã³ ĩ³ye³kxi²te³nah¹lxi¹: “Txa²wã¹sũ̱³na² wãn³txi³kxai³lu¹: ‘Txa²hxi²kan¹jah¹lãi³. Txa²wi¹lha²tãu³a² ã³wxe³sẽ¹li¹.
35 Ye³jen¹nãu³a² wxa²ko̱¹ko̱¹nũ̱³ka̱³txa² a²wa³ka³ti³lo³txa²lain¹ju³ta² yan³txi³su² ĩ³hxi²ka¹txa²ha¹tu¹wi¹. Nxe³nxa²tu¹wi¹.’ Txa²wã¹sũ̱³na² nxe³ta¹hxai²hẽ¹li¹.” Nxe³jau³jau¹xai²na² Ta³vi²yah³lu¹ta²kxai³ nxe³ta¹hxai²hẽ¹le¹.
36 Jã¹nxe³jut3su² Je³su²jah³lai¹tã² ĩ³hxi²kĩ¹la³kxah¹lxin¹jah¹lai¹tã² Txa²wã¹sũ̱³na² hi²sen³kxai³lu² Txa²wã¹hxi²kan¹ta² Si³yxau³ka³jah³la² ne³te²lo³tha²kxai³ Kris²tu³jah¹lo²su² ne³te²lo³tha²kxai³ nxe³ye¹nx2tain¹na²hẽ³le¹. Nxe³jau³su² I³sa³e² nũ̱³ka̱³txa² yxo²ha³kxa¹ ain³kxi²jau³nũ³ai²la¹we¹. Na¹jau³su² nxe³ye¹nx2ta¹we¹. Pe²jah³lu¹ta²kxai³ nxe³ta¹hxai²hẽ¹la².
37 Nxa²ha¹te¹ tũ̱¹ka̱³txai²li² jau³jau¹xai²na² ain³kxain¹nũ²la² a²ẽ¹nãu³ai²na² ĩ³ãin²ta³kxi²nha²sxã³ Pe²jah³lu¹ta²kxai³ ĩ³ye³kxain¹te³nah¹lxi¹: — Nxe³si¹lxi¹. Txa²wã³tã̱³sa²nhĩ¹lxi¹. Ĩh¹nxe³ju³ta² o²la³kxi²sĩn¹te³la¹ji¹wi¹, ko̱³nxe³ti³ kãi³sĩ¹na¹ju³ta² ũ³hũ¹sa²nhĩn¹kxa²ya̱n³txi³su¹? Ain¹ta¹hxai²hẽ¹la².
38 Nxa²ha¹te¹ Pe²jah³lu¹tai²na² sa²kxai³lu² ĩ³wa²lũ³xi²ti³an¹jau³kxai³lu¹: — Wxãi²na² yxo²ha³kxa¹ ko̱³nxe³ti³ kãi³yah³lxin¹ju³ta² ĩ³ãin²ta³kxi²nha²sãn²sxã³ ã³na¹jah¹lxi³hẽ¹le¹. Yah³lxin¹kxai²nãn²tu̱³ wxa²ko̱³nxe³ti³ju³ta² ã³wa²su¹kxi¹nx2ti³tu¹we¹. Nxe³yah³lxin¹ka³tu̱³ ĩ̱³yau³xa² ũ³hũ¹kxi²sa²sai¹nx2tain¹ju³ta³nũ³a² ĩ³ye³kxi¹txai¹yah³lxi³hẽ¹le¹. Nxe³yah³lxin¹kxai²nãn²tu̱³ Je³su² Kris²tu³jah¹la² a²sa³wi³ha³lxi³nũn³syah¹lxin¹tu¹we¹. Nxe³sxã³ Txa²wã¹sũ̱³na² A²yãu³ka³txa² nxũ²kwa̱i³yxau³nx3ti²tu³we¹.
