Atos 25:13-21

¹³Hari. Oniaroa, radaha'ihi ida semana 'bamiki. Cesaréia sidajia vakaikahi'aha adani Agripa, kidigamo khama. Arabo hoariha kaka'da'dini ada Agripa oniki. Kidigamo onini Berenice. Cesaréia avikha'aha, Festo-ra vaka'ivanitivini hiki kidiania vavaa'ahahana.

¹⁴Mahi hoariha Festoa vara bivani'a'ihi ida Paulo varani hina. Arabo kaka'da'dini-ra ni'aha: —Agripa, hojaki ada makhira gathaki kodiania. Ajihiha ada Félika, Paulo-ra nahojaha'aha.

¹⁵Jerusaléa ookha'iki ho, vara hora vani'a'iki adani sasidotxi vavaka'da'diva, ija'ari vanava'isohiva abono vihiki khama. Paulo-ra avanaathidanoarari'ahapikivini hiki hora vakanikhariavini Paulo abinina-ra ovahonariahivinia.

¹⁶Ogathanihi ida vaathi: “Roma sidaji kaija'arini kahojai hirihi ida ija'ari abinini-ra ovahonariahivini, oogaravini oadani ida kidibadani asohini asohirini. Gathakia bikamitha'imidiava ida vakadi'aathidanoarari. Bikamithavini naothinia gathaki maina abono-ra vajari'daha. Vakadivarani hahavi okamithavini naothinia onasohi'ihi. Nimania ida arihojana.” Va'ora oni'avini hi'iki.

¹⁷Hari. Okaikahina vani hida, vakaikahi'aha adani jaboni Paulo-ra avanaathidanoarari'iki. Ni-okajoniki ida vakadivarani okamithavini. Ka'afokajomani ija'ari akaathidanoarari ibavinia ovithi'ihi. Ohonariaha ada kodisorara Paulo-ra anikhavini.

¹⁸Vigaamanani'aha adani Paulo-ra avanaathidanoarariki. Badani asohiriki arafiaki-ra bada ni'aki ovanihavini ada Paulo. Ni-nini okamithaki ida vakadivarani.

¹⁹Judeus kaija'ari kahojai Pauloa bikajonivini vakahiki. Vara vavani'a'aha ada makhira hoariha Jesus oniki. Abini'ina vakahiha ada Jesus. Pauloa ahokina vani bikahi'aha ada Jesus.

²⁰Hari. Ni-ooga'iki ida vakadivarani onasohivini. Onofi'iki oogajahakivini ida vakadivarani, oniani ida Paulo-ra onana'dohivini hija: “Paulo, inofimania koda ida Jerusaléa iokhani? Okamithajahakivini onofiki ida avakadivarani naothinia onasohi'ihi.” Paulo-ra oni'a'iki ho.

²¹Hora ni'aha: “Iniani. Onofiki hora ikaronavini arabo ipohiki kaka'da'dini kania Roma sidajia, ovaria binasohija kaimoni hida akadivarani. Hora ikaronaravini oadani onofiki hida ogathana ohojana.” Hora ni'aha ada Paulo. Oniaroa sorara-ra va'ora ohonaria'ihi: “Roma sidajia okaronaravini oadani iakadava'a bana hada Paulo.” — Festoa bini'aha ada Agripa.